سندھ پولیس کورونا ڈیوٹی چھوڑ کر مساجد کے امام کے گھروں پر چھاپے مار رہی ہے، مفتی منیب الرحمان

اسلام ٹائمز۔ چیئرمین رویت ہلال کمیٹی مفتی منیب الرحمان نے مطالبہ کیا ہے کہ تمام مساجد کے پیش اماموں پر درج مقدمات واپس لئے جائیں، سندھ حکومت منافقت کو چھوڑ کر دو ٹوک فیصلہ کرے۔ ایک بیان میں مفتی منیب الرحمان نے کہا ہے کہ  سندھ حکومت منافقت کو چھوڑ کر دو ٹوک فیصلہ کرے، سندھ پولیس کورونا ڈیوٹی چھوڑ کر مساجد کے امام کے گھروں پر چھاپے مار رہی ہے۔ انہوں نے مطالبہ کیا کہ تمام مساجد کے پیش امام پر درج مقدمات واپس لئے جائیں۔ ان کا کہنا تھا کہ حکومت کا کام حکمت سے معاملات کو چلانا ہوتا ہے، مساجد کو مکمل سیل کرنا ہے تو ایس ایچ او کے ذریعے کرایا جائے، مساجد کی انتظامیہ نہ سیل توڑے گی اور نہ مزاحمت کرے گی۔ انہوں نے کہا کہ حکومت کے مفاد میں یہ ہے کہ علماء کے تعاون سے اپنی مہم کو کامیاب بنائے، مسجد کھلی ہوگی تو امام کسی کو آنے سے نہیں روک سکتا اور اپنی ڈیوٹی انجام دے گا۔