پشاور ہائیکورٹ کا مصنوعی پٹرول بحران پیدا کرنے والوں کیخلاف کارروائی کا حکم

اسلام ٹائمز۔ پشاور ہائیکورٹ نے پٹرول کی عدم دستیابی کا نوٹس لیتے ہوئے مصنوعی بحران پیدا کرنے والوں کے خلاف کارروائی کا حکم دیدیا۔ تفصیلات کے مطابق پٹرول پمپس پر پٹرول کی عدم دستیابی پر جسٹس قیصر رشید نے از خود نوٹس کیس کی سماعت کی تو ڈپٹی کمشنر پشاور عدالت میں پیش ہوئے، عدالت نے پٹرول کا مصنوعی بحران پیدا کرنے والوں کے خلاف کارروائی کا حکم دیتے ہوئے ہدایت دی کہ جن پٹرول پمپس پر پٹرول دستیاب ہے اور لوگوں کو نہیں مل رہا اسے سیل کیا جائے۔ جسٹس قیصر رشید نے ڈپٹی کمشنر سے استفسار کیا کہ پشاور میں آٹا بحران کیوں ہے؟ جس پر ڈی سی نے بتایا کہ پنجاب سے گندم کی سپلائی نہیں ہو رہی اس وجہ سے آٹا کی کمی کا سامنا ہے۔ جسٹس قیصر رشید نے کہا کہ پنجاب بھی اس ملک کا حصہ ہے گندم کی پیداوار اچھی ہوئی ہے اس مسلے کو حل کریں، ابھی گندم کٹائی کا سیزن گزرا ہے چاہیئے تھا ریٹ کم ہوتا لیکن مزید مہنگا کر دیا۔ عدالت نے پوچھا کہ چکن بھی مارکیٹ میں مہنگا ہے اس کی کیا وجہ ہے؟ تو ڈپٹی کمشنر نے بتایا کہ لاک ڈاون اور راستوں کی بندش کی وجہ سے فارمرز نے چوزے مار دیئے تھے جس کی وجہ سے مارکیٹ میں مرغی کی شدید کمی ہے، لاک ڈاون میں سپلائی نہ ہونے کی وجہ سے مرغی کا ریٹ گر گیا تھا، فارمرز کو نقصان ہورہا تھا اس وجہ سے چوزے مار کر فارمز خالی کئے تھے، کچھ دنوں بعد چکن کا ریٹ معمول پر آجائے گا۔