امریکی پولیس کے ہاتھوں بےدردی کیساتھ مارا جانیوالا سیاہ فام شہری کرونا کا مریض تھا، پوسٹمارٹم رپورٹ

اسلام ٹائمز۔ امریکی ریاست مینیسوٹا کے شہر مینیاپولیس میں سفید فام امریکی پولیس افسر کے ہاتھوں سرعام بےدردی کے ساتھ قتل ہونے والے سیاہ فام امریکی شہری جارج فلوئڈ کی پوسٹمارٹم رپورٹ منظر عام پر آ گئی ہے۔ امریکی ریاست مینیسوٹا کے شہر مینیاپولیس میں واقع ہنیپین ہسپتال سے جاری ہونے والی اس پوسٹمارٹم رپورٹ میں کہا گیا ہے کہ 46 سالہ سیاہ فام امریکی شہری جارج فلوئڈ جو گذشتہ سوموار کے روز امریکی پولیس افسر کے ہاتھوں قتل کر دیا گیا تھا، کئی ہفتوں سے کرونا وائرس کا مریض تھا۔ امریکی خبررساں ایجنسی این بی سی (NBC) کے مطابق 3 اپریل 2020ء کے روز جارج فلوئڈ کا کرونا وائرس کے لئے لیا گیا جینیٹک ٹیسٹ (RNE) مثبت آیا تھا۔ واضح رہے کہ سفید فام امریکی پولیس افسر کے ہاتھوں سیاہ فام جارج فلوئڈ کے سرعام بہیمانہ قتل پر پورے امریکہ میں نسل پرستی کے خلاف وسیع پیمانے پر احتجاجی مظاہرے جاری ہیں جن میں تاحال کم از کم 11 افراد ہلاک اور 9 ہزار 300 سے زائد گرفتار کئے جا چکے ہیں۔