اسلام ٹائمز۔ آرمی چیف جنرل قمرجاوید باجوہ نے کور ہیڈ کوارٹرز کراچی کا دورہ کیا۔ دورہ کے موقع پر آرمی چیف کو کور کی پیشہ وارانہ تیاریوں، تربیتی مراحل، انتظامی امور پر بریفنگ دی گئی۔ آرمی چیف نے اس موقع پر خطے میں ہائبرڈ خطرات سے موثر طور پر نمٹنے پر زور دیا۔ انہیں اس موقع پر کراچی میں مختلف ترقیاتی منصوبوں سے متعلق بھی بریفنگ دی گئی۔ خاتون پاکستان گورنمنٹ گرلز سکول کراچی کے دورہ کے موقع پر جنرل قمر جاوید باجوہ نے کم آمدنی والے گھرانوں کی بچیوں کو اعلیٰ اور جدید تعلیمی سہولتوں کی فراہمی کو سراہا۔ آرمی چیف نے شہداء کے خاندانوں سے گفتگو بھی کی۔ اس موقع پر انہوں نے شہداء کے خاندانوں کی فلاح و بہبود کیلئے تمام ضروری اقدامات کی ہدایت بھی کی۔