احمد جاوید صاحب آپ بھی انصاف کریں

تحریر: سید اسد عباس

2022ء کی بات ہے کہ عروۃ الوثقی کے ایک اعلیٰ سطحی لیکچر میں معروف نقاد، ادیب، فلسفی و صوفی مبلغ احمد جاوید صاحب نے شرکت کی۔ جامعہ کے مہتمم قبلہ جواد نقوی نے خطاب کرتے ہوئے کہا کہ مدارس کے لوگ اگرچہ احمد جاوید صاحب سے آگاہ نہیں، لیکن علمی حلقوں میں یہ ایک معروف شخصیت ہیں۔ انھوں نے کہا کہ احمد جاوید صاحب اگرچہ مدرسہ کے پڑھے ہوئے نہیں ہیں، لیکن علامہ ہیں اور یہ اسی معنیٰ میں علامہ ہیں، جس معنیٰ میں علامہ محمد اقبال علامہ تھے۔ علامہ محمد اقبال اور احمد جاوید کے مابین مشترک خصوصیت فلسفہ کو جاننا ہے، احمد جاوید صاحب کے ابن عربی کی کتاب فصوص الحکم پر لیکچرز آن لائن موجود ہیں۔ پاکستان میں بہت کم ایسے لوگ ہیں، جو فصوص الحکم کو سمجھتے ہوں، لیکن احمد جاوید فصوص الحکم کی شرح پیش کرتے ہیں۔

اگر ابن عربی کی فصوص الحکم کو جاننا اور فلسفی مکاتب کو جاننا علم ہے تو واقعی احمد جاوید صاحب ایک عالم ہیں، جن کے پائے کا دوسرا عالم پاکستان میں ناپید ہے۔ اس بات کو جامعہ العروۃ کے سربراہ نے بھی قبول کیا۔ احمد جاوید فلسفی، شارح فصوص الحکم ہونے کے علاوہ ادبی نقاد اور شاعر بھی ہیں۔ انھوں نے برصغیر کے بڑے قدیم اور جدید شعراء و ادیبوں پر نقد لکھی ہیں۔ شعری دنیا میں انھوں نے بہت سی نظمیں کہیں، جن میں جہاں منقبت امیر المومنین ؑ پر مشتمل نظمیں شامل ہیں تو وہیں صحابی امیر المومنین ؑ مالک اشتر کی مذمت میں بھی شعر موجود ہیں۔ احمد جاوید صاحب گذشتہ ایک ہفتے سے اپنے یوٹیوب چینل پر شیعہ مخالف ویڈیوز اپ لوڈ کر رہے ہیں۔ ایسا محسوس ہوتا ہے کہ انھیں کسی نے کہا ہے کہ اگر آپ اختلافی بات کریں گے تو آپ کی بات کو سنا جائے گا، جس سے آپ کی شہرت میں اضافہ ہوگا۔

ان کی گذشتہ ہفتے ریکارڈ ہونے والی ویڈیو جس کا عنوان "غزہ، شاباش ایران، خبردار پاکستان" تھا، میں انھوں نے ولایت فقیہ، شیعہ عقیدہ افضلیت امامت اور غزہ کے مسئلہ پر بات کی۔ ان کو اس ویڈیو کے بعض جوابات دیئے گئے۔ ڈاکٹر حسنین نادر اور قبلہ جواد نقوی کے چند کلمات میں نے سنے ہیں۔ ڈاکٹر حسنین نادر نے ولایت فقیہ کی وجہ سے پیدا ہونے والے حب الوطنی کے کرائسیس پر بات کی، جبکہ قبلہ جواد نقوی نے غزہ کے بارے ایران کی پالیسی کے حوالے سے سوالات کا جواب دیا۔ میری نظر میں قبلہ احمد جاوید صاحب کو جیسا علمی جواب دیا جانا چاہیئے، نہیں دیا گیا، جس کا شکوہ احمد جاوید نے ان الفاظ میں کیا کہ دشنام دینا، ناصبی کہنا، فرقہ پرست کہنا آسان ہے، لیکن کسی بات کا علمی جواب دینا آسان نہیں ہے۔

احمد جاوید صاحب کی دوسری ویڈیو "دل صاحب انصاف سے انصاف طلب ہے" کے زیر عنوان ریکارڈ کروائی جبکہ تیسری ویڈیو فقط سید جواد کو مخاطب کرکے بنائی گئی۔ اپنی گذشتہ تحریر میں، راقم نے امامت کی افضلیت کے عقیدے کے حوالے سے دو دلائل پیش کیے، اسی طرح یہ بتایا کہ پاکستان کے شیعہ کسی بھی فرقے یا گروہ کے لیے سیاسی خطرہ نہیں ہیں بلکہ وہ عام پاکستانیوں کی مانند سیاسی بے رحمیوں کا شکار ہیں۔ اکثر شیعہ اور سنی  بچوں کا بچپن ایک ہی ماحول میں گزرتا ہے اور جوانی میں یہ رشتہ کی ڈور میں بندھ کر ایک ہی گھر میں زندگی گزارتے ہیں۔ احمد جاوید صاحب نے اپنی دوسری ویڈیو جس کا عنوان "دل صاحب انصاف سے انصاف طلب ہے" تھا، میں اپنے اوپر ہونے والے اعتراضات اور لگنے والے الزامات کے حوالے سے گفتگو کی۔

اس ویڈیو میں انھوں نے اپنے وہ فضائل گنوائے، جو کہ اتحاد و وحدت نیز ان کے سچا مسلمان ہونے کی دلیل تھے۔ احمد جاوید صاحب کہتے ہیں کہ میں نے شیعہ شعراء کے کلام پر نقد لکھی ہے، اگر مکتب تشیع میں ایسا کوئی نقاد موجود تھا تو اس سے کہا جاتا کہ میر انیس پر تنقید لکھتے اور ان کی شاعری کا جائزہ پیش کرتا۔ وہ کہتے ہیں کہ میں نے تقریباً سو سے زیادہ منقبتیں امیر المومنین علی ؑ کی شان میں لکھیں۔ میں شیعہ کو اپنی اصلاح کی دعوت دے رہا ہوں۔ انھوں نے اپنی گفتگو کے دوران میں کچھ دھمکی آمیز لہجہ بھی اختیار کیا، جو ان کے منصب و مقام سے میل نہیں کھاتا۔ ہم انتظامی اقدامات کریں گے، اب نہیں معلوم کہ وہ یہ بات اپنی حیثیت میں کہ رہے تھے یا کسی کی ترجمانی کر رہے تھے۔

احمد جاوید صاحب کا ماضی اور مغالطے
احمد جاوید صاحب کا تعلق امروہا سے ہے، وہ شیعہ علماء اور اساتذہ کی علمی استعداد کو تسلیم کرتے ہیں۔ ان کے اساتذہ اور دوستوں میں بہت سی شیعہ علمی شخصیات موجود ہیں۔ انھوں نے کہا کہ میں نے بہت سی شیعہ محافل میں شرکت کی ہے، جہاں تبرا کیا جاتا ہے۔ اگرچہ مجھے اسی موقع پر اس عمل کو روکنا چاہیئے تھا، تاہم اب میں نے فیصلہ کیا ہے کہ میں اس کے خلاف بات کروں۔ وہ اپنی گفتگو میں شیعہ، شیعوں کے عقائد، شیعوں کی محافل، ایران، نظام ولایت فقیہ، ایران حکومت کی سیاسی پالیسیاں، اتحاد و وحدت سبھی باتوں کو ایک ہی لاٹھی سے ہانکتے ہوئے دکھائی دیتے ہیں۔

ایک سانس میں کہتے ہیں کہ تمام شیعہ ولایت فقیہ کے قائل نہیں، اسی سانس میں کہتے ہیں کہ شیعہ ایران کا دفاع کرنا اپنے لیے اتنا ہی ضروری سمجھتے ہیں، جتنا شیعت کا دفاع ہے۔ ایک جانب وہ روایتی اور غیر مقلد شیعوں کو ایران اور ایرانی نظام سے جدا کرتے ہوئے کہتے ہیں کہ ان کا ایران سے تعلق نہیں، دوسری جانب کہتے ہیں کہ نصیریت ایران پر حاوی ہوچکی ہے اور ایران ان نصیریوں اور تبرائیوں کو مدد کر رہا ہے۔ ان کی اکثر باتوں میں تضاد موجود ہے، جو ان کی سطح کے منطقی سے متوقع نہیں، تاہم مغالطے پیدا کرنا اہل فلسفہ کا کام ہے، جو احمد جاوید صاحب نے اپنی گفتگو میں بخوبی انجام دیا۔

عقائد کا اختلاف اور احمد جاوید کا زعم اکثریت
عقائد کا اختلاف ایک کلامی مسئلہ ہے، جو صدیوں سے مسلمانوں میں زیر بحث ہے۔ عقائد کے لحاظ سے اگر ہم اپنی قوم کو تقسیم کریں گے تو سنی وحدت و اکثریت بھی ایک سراب بن جائے گی۔ بریلویوں، دیو بندیوں اور اہل حدیث کے ایک دوسرے کے خلاف کفر کے فتوے، پھر ان فرقوں میں عقیدتی و سیاسی اختلافات اگر سامنے رکھے جائیں تو آپ کسی بھی فرقہ کو اکثریت یا اقلیت قرار نہیں دے سکتے۔ قبلہ مجھے نہیں معلوم آپ دیوبندی مسلمان ہیں یا بریلوی، آپ کا تعلق اہل حدیث سے ہے یا فقط صوفی روایت کو مانتے ہیں۔ اگر آپ اس لباس میں خود کو دیکھیں تو آپ کو معلوم ہوگا کہ حقیقی اقلیت کون ہے، حقیقی اکثریت کون۔ تاہم میں سمجھتا ہوں کہ اس بات کو اٹھانا ہی فرقہ وارانہ ہے۔ ہم سب مسلمان ہیں، امت رسول ہیں، پاکستانی ہیں، یہی تعارف ہمارے لیے کافی ہونا چاہیئے۔ مسلک و فقہ ہمارا ذاتی مسئلہ ہے، جسے ہمیں وجہ نزاع نہیں بنانا چاہیئے۔

 آپ نے خاندان اجتہاد کے علمی رسالوں کا حوالہ دیا، تاہم آپ نے غور نہیں فرمایا کہ اس خاندان نے جتنے بھی علمی رسالے تحریر کیے ہیں، وہ اہل سنت علماء کے جواب میں تحریر کیے ہیں۔ دلدار نقوی غفران مآب جو خاندان اجتہاد کے موسس جانے جاتے ہیں، انہوں نے درج ذیل کتابیں اپنے اوپر ہونے والے اعتراضات کے حوالے سے تحریر کیں ۔(الصوارم الالٰھیات فی قطع شبھات عابدی العزی اللات (تحفہ اثنا عشریہ کے باب پنجم کا جواب جو الٰہیات کے بارے میں ہے،(حسام الاسلام و سھام الملام (تحفہ اثنا عشریہ کے باب ششم کا جواب جو نبوت کے بارے میں ہے، (احیاء السنة بطعن الاسنہ (تحفہ اثنا عشریہ کے باب رجعت و معاد کا جواب، (رسالہ ذوالفقار (تحفہ اثناء عشریہ کے بارہویں باب کا جواب، (رسالہ غیبت) غیبت امام زمانہ کے حوالے سے طعن کا جواب۔

شیعہ علماء کا زیادہ وقت اپنے اوپر لگائے جانے والے اعتراضات کا جواب دینے میں ہی گزرا۔ ہمیں کب اپنی فقہ اور عقائد کو پھیلانے کی آزادی رہی۔ کیا آپ  چاہتے ہیں کہ شیعہ اپنے عقائد پر ہونے والے اعتراضات کا جواب بھی نہ دیں۔ احمد جاوید صاحب نے تبرا ایجی ٹیشن کا ذکر کیا، تاریخ کا طالب علم جانتا ہے کہ یہ ایجیٹیشن مدح صحابہ ایجی ٹیشن کی رد میں منظر عام پر آئی، جب اہل تشیع نے دیکھا کہ ہمارے مذہبی جلوسوں کو میلوں میں بدلنے کی کوشش کی جا رہی ہے۔ ہمارے عقائد کو سرعام دشنام کا سامنا ہے تو وہ تبرا ایجی ٹیشن کرنے پر مجبور ہوئے۔ احمد جاوید صاحب، کیا آپ چاہتے ہیں کہ شیعہ خاموشی سے یہ سب سہتے رہتے۔ "دل صاحب انصاف سے انصاف طلب ہے"

روہیل کھنڈ اور ریاست اودھ کا قصہ
آپ نے روہیل کھنڈ اور سلطنت اودھ کی بات کی اور کہا کہ وہاں اہل سنت پر ظلم و ستم روا رکھا جاتا تھا اور کہا کہ اگر روہیل کھنڈ چاہتے تو سلطنت اودھ کو ختم کر دیتے۔ تاریخ کہتی ہے کہ 1772ء میں روہیلوں کے سردار حافظ رحمت خاں یوسفزئی نے مرہٹوں کے آئے دن کی چھیڑ خانی سے تنگ آکر شجاع الدولہ نواب اودھ کے ساتھ معاہدہ کیا کہ روہیل کھنڈ پر مرہٹوں کے حملے کی صورت میں نواب اودھ روہیلوں کی مدد کرے گا اور روہیلے اس کے عوض نواب کو چالیس لاکھ روپیہ دیں گے۔ 1773ء میں مرہٹوں نے روہیل کھنڈ پر حملہ کیا، نواب اودھ اور انگریزوں کی مشترکہ فوجوں نے روہیلوں کا ساتھ دیا اور مرہٹے پسپا ہوگئے۔

روہیلوں اور اودھ کا مسئلہ روہیلوں کی جانب سے وعدہ کردہ رقم کا مہیا کرنا نہ تھا، جس پر عہدنامہ بنارس کی روشنی میں سلطنت اودھ نے روہیلوں پر حملہ کیا اور ان کو پسپا کر دیا اور روہیل کھنڈ کو سلطنت اودھ میں شامل کر لیا گیا۔ اب نہیں معلوم قبلہ کیسے کہہ رہے ہیں کہ روہیلوں کے مقابلے میں سلطنت اودھ ایک بلبلہ ثابت ہوتی۔ ہمیں سلطنت اودھ کا دفاع نہیں کرنا، وہ شیعہ تھے، لیکن ان کے سیاسی اقدامات قابل تنقید بھی ہوسکتے ہیں اور قابل مذمت بھی، اسی طرح یہ کہنا بھی غلط ہے کہ روہیل کھنڈ کے سنی اتحاد و وحدت کا مظاہرہ کرتے رہے اور اگر وہ اقدام کرتے تو سلطنت اودھ کو ختم کر دیتے۔

ریاست اودھ کی علمی خدمات کے بجائے ان کے مظالم کا تذکرہ
اردو ادیب اور نقاد ہونے کی حیثیت سے نہ جانے کیوں احمد جاوید صاحب سلطنت اودھ کی علمی و ادبی خدمات کو بھول گئے اور فقط وہاں شیعہ ظلم و ستم کو ہی پیش کرنے پر اکتفاء کیا، جس کے وہ حوالے دینے سے قاصر رہے۔ نوابان اودھ کی شاعروں، ادیبوں اور علماء کی حوصلہ افزائی تاریخ کا حصہ ہے۔خان آرزو، سودا، مصحفی، جرات، انشاء اور میر تقی میر اسی دور میں لکھنو آئے اور اردو ادب کی آبیاری کی۔ مشہور شاعر حیدر علی آتش اگرچہ فیض آباد میں پیدا ہوئے تھے، لیکن ان کے والد دہلی سے نقل مکانی کرکے اودھ آگئے تھے۔ شاہان اودھ کے زمانے میں مرثیہ نگاری نے خاص طور پر عروج پایا اور اردو زبان کے سب سے بڑے مرثیہ نگار میر انیس اور مرزا سلامت علی دبیر اسی دور سے تعلق رکھتے تھے۔

دینی تعلیم کے سلسلے میں یہ دور اس وجہ سے قابل ذکر ہے کہ ملا نظام الدین نے تعلیم کا وہ مشہور نصاب اسی زمانے میں ترتیب دیا، جو آج بھی درس نظامیہ کے نام سے مشہور ہے۔ لکھنؤ کا محلہ "فرنگی محل" اس دور میں برصغیر کا سب سے بڑا تعلیمی مرکز بن گیا۔ ملا نظام الدین کا انتقال 1748ء کے بعد ہوا۔ اودھ کا قصبہ بلگرام اس لحاظ سے قابل ذکر ہے کہ اس زمانے میں وہاں کی خاک سے کئی قابل ذکر علماء اٹھے۔ ان میں غلام علی آزاد اور سید مرتضیٰ زبیدی قابل ذکر ہیں۔ کیا احمد جاوید کے پاس ان کے ممدوحین یعنی روہیل کھنڈوں کی بھی ایسی ہی علمی خدمات موجود ہیں۔

اتحاد امت ایرانی پراجیکٹ یا عالم اسلام کی ضرورت
اتحاد امت کا ایرانی نظریہ ان کی تنقید کا خصوصی طور پر نشانہ بنا، وہ کہتے ہیں کہ یہ نظریہ ایران کا آخری مورچہ ہے، جب ایران کہتا ہے کہ سنی ہمارے بھائی ہیں یا سنی ہماری جان ہیں تو اس سے مراد یہ ہے کہ وہ جلد ہی ہمارا مکتب اختیار کر لیں گے۔ وہ مظلوموں کی مدد اس لیے کرتا ہے، تاکہ ان کو شیعہ کیا جاسکے۔ ان کی نظر میں پاکستان میں اتحاد امت کا نعرہ بھی اسی تناظر میں لگایا گیا ہے اور یہ بنیادی طور پر ایرانی حکمت عملی ہے۔ وہ کہتے ہیں کہ سعودیہ نے یہ نعرہ کبھی بھی نہیں لگایا، کیونکہ وہ منافق نہیں ہے۔احمد جاوید صاحب ملی یکجہتی کونسل پاکستان کے ایک ذمہ دار شخص کی حیثیت سے آپ کی اس بات کی سختی سے مذمت کرتا ہوں اور اسے اتحاد امت کے لیے پرخلوص کوششیں کرنے والے علماء، قائدین اور دانشوروں کی بے لوث خدمات پر حملہ تصور کرتا ہوں۔

آپ کو اچھی طرح سے علم ہے کہ سنی و شیعہ مسلکی وحدت تو کبھی بھی نہ رہی اور ممکن بھی نہیں ہے، لیکن سماجی وحدت ایران کی پالیسی کا نتیجہ نہیں ہے۔ زیادہ دور نہیں جاتا، اگر آپ فقط تحریک پاکستان کا بغور جائزہ لیتے تو کبھی بھی یہ بات نہ کرتے کہ شیعہ سنی اتحاد ایرانی سیاسی حکمت عملی کا شاخصانہ ہے۔ تحریک پاکستان میں پاکستان بھر سے سنی علماء، قائدین، دانشوروں اور عوام نے قائداعظم محمد علی جناح جو کہ خوجہ اثناء عشری تھے، ان کی قیادت پر اتفاق کیا اور مشترکہ ہدف کے لیے مل کر جدوجہد کی۔ 1947ء میں برصغیر کے شیعہ اور سنی مسلمان جن میں لکھنؤ، حیدر آباد کے شیعہ نواب، صوبہ سرحد، صوبہ پنجاب اور صوبہ سندھ کے دیوبندی، بریلوی اور اہل حدیث علماء، پیر، سیاسی قائدین سبھی شامل تھے، جنہوں نے مل کر پاکستان بنایا۔ برصغیر میں مختلف مسالک سے تعلق رکھنے کے باوجود یہ سماجی وحدت موجود تھی اور اس کا سبب ایران ہرگز نہیں تھا۔

1965ء کی جنگ پاکستانی افواج کے شیعہ، سنی، عیسائی جرنیلوں اور فوجیوں نے مل کر لڑی، 1971ء میں پاکستان کا آئین شیعہ اور سنی آبادی نے مل کر بنایا، اس وقت تک تو ایران میں انقلاب کا نام و نشان تک نہ تھا، ایوب دور میں پیش کیے جانے والے اکتیس علماء کے بائیس نکات شیعہ و سنی علماء کی مشترکہ کاوش ہیں، جس کا ایران کی اتحاد و وحدت کی پالیسی سے دور دور کا لینا دینا نہیں ہے۔ لہذا قبلہ اپنی اصلاح فرمائیں کہ پاکستان میں شیعہ سنی اتحاد و وحدت کا نعرہ کسی ملک کی سیاسی حکمت عملی کو بڑھاوا دینے کے لیے نہیں بلکہ پاکستانی شیعہ و سنی علماء کی ذاتی خواہش اور ضرورت ہے۔

ملی یکجہتی کونسل پاکستان کا قیام
1995ء میں ملی یکجہتی کونسل پاکستان کا قیام ایران نے ممکن نہیں بنایا بلکہ اس کے بنانے والے پاکستان کے ادارے اور پاکستان کے مخلص اور جید علماء و قائدین تھے، انہی علماء نے مل کر 2011ء میں ملی یکجہتی کونسل پاکستان کا دوبارہ احیاء کیا۔ لہذا آپ کا کہنا کہ اتحاد و وحدت کی بات ایک ایرانی موقف یا ایرانی ایجنڈا ہے، بالکل بھی درست نہیں۔ آپ کو اپنے اس فہم سے رجوع کرنا چاہیئے اور پاکستان میں اتحاد امت کی مخلصانہ کوششوں کو مورد سوال نہیں ٹھہرانا چاہیئے۔ آپ کو یہ بات کرنے سے پہلے بخوبی اندازہ ہونا چاہیئے کہ آپ اس طرح کے اظہارات کرکے کس کو فائدہ پہنچا رہے ہیں۔

شیعہ سنی اتحاد کے لیے اعلان مکہ، عمان ڈیکلیریشن کا بھی مطالعہ فرمائیں، تاکہ آپ کو معلوم ہو کہ عالم اسلام کی کن کن شخصیات نے اتحاد امت کے لیے کوششیں کی ہیں۔ یہ کہنا کہ سعودی اتحاد امت کی بات نہیں کرتا، کوئی فخر کی بات نہیں ہے بلکہ یہ قرآنی حکم "اللہ کی رسی کو مضبوطی سے تھامو" کی خلاف ورزی ہے۔ عالم اسلام کے ہر ملک کو عالم اسلام میں سماجی وحدت کے قیام کے لیے دینی اور اسلامی جذبے کے ساتھ کوشش کرنی چاہیئے، یہ ہماری سماجی ضرورت ہی نہیں بلکہ دینی تقاضا بھی ہے۔ سعودیہ میں اعلان مکہ کا ہونا اس کی اتحاد امت کی کوششوں کا ہی نتیجہ ہے۔