مرکزی کنونشن

اسلام ٹائمز۔ فیصل آباد میں جعفریہ اسٹوڈنٹس آرگنائزیشن پاکستان کا دو روزہ تعمیر سیرت و ارتقاء پاکستان، مرکزی کنونشن امام بارگاہ قصر رضا (علیہ السلام)، رضا آباد میں شروع ہوگیا ہے۔ کنونشن کے پہلے دن، ملتان، بھکر، ڈی جی خان، فیصل آباد، سکھر، لاڑکانہ، حیدر آباد، کراچی، ڈیرہ اسماعیل خان، ٹانک، نصیر آباد سمیت ملک بھر سے جے ایس او کے سینکڑوں عہدیداران، کارکنان اور سینیئرز شریک ہیں۔ مرکزی کنونشن میں جے ایس او پاکستان کے بانی افتخار حسین نقوی، قائم مقام مرکزی صدر عبداللہ رضا، شیعہ علماء کونسل فیصل آباد ڈویژن کے صدر علامہ اعجاز مہدی، سابقہ صوبائی صدر پنجاب جون مہدی، کوآرڈنیٹر مرکزی کنونشن حیدر انقلابی بھی خصوصی طور پر شریک ہیں۔ جعفریہ اسٹوڈنٹس آرگنائزیشن پاکستان کے قائم مقام مرکزی صدر عبداللہ رضا نے اپنے ابتدائی خطاب میں کہا کہ جے ایس او پاکستان ملی پلیٹ فارم کا ایک حصہ ہے، جو پاکستان میں طلباء کی فلاح و بہبود کے لئے کام کر رہی ہے۔ انکا کہنا تھا کہ تنظیم میں طلباء کی نظریاتی، فکری اور جدید عصری تقاضوں کے مطابق تعلیمی تربیت کی جاتی ہے، ملک بھر کے کونے کونے سے آئے ہوئے عہدیداران اور کارکنان کی شرکت اس بات کی نشاندہی کر رہی ہے کہ یہ ایک منظم تنظیم ہے۔ جعفریہ اسٹوڈنٹس آرگنائزیشن کے مرکزی کنونشن میں شیعہ علما کونسل پاکستان خیبر پختوںخواہ کے صدر علامہ توقیر رمضان بھی تشریف لاچکے ہیں۔ واضح رہے کہ کنونشن کے دوسرے دن میں شیعہ علما کونسل پاکستان کے قائد، علامہ سید ساجد علی نقوی خصوصی طور پر شرکت کرکے خطاب کرینگے، جبکہ الیکشن کے ذریعے اگلے صدر کو منتخب کیا جائے گا۔