اسلام ٹائمز۔ روس نے خبردار کیا ہے کہ ایران پر امریکی حملے کا حقیقی خطرہ موجود ہے۔ روس کی سلامتی کونسل کے سیکرٹری نکولیا یاترو شیو نے اپنے ایک انٹرویو میں کہا کہ شام جس نے تہران کے ساتھ تعلقات توڑنے سے انکار کر دیا ہے، کو بھی مغربی مداخلت کا سامنا ہو سکتا ہے، کیونکہ امریکہ اسے اس طرف دھکیل رہا ہے۔ انہوں نے کہا کہ اس وقت امریکہ ایران کو اپنا اہم مسئلہ سمجھتا ہے اور اسی وجہ سے وہ تہران کو ایک دشمن سے معاونتی پارٹنر میں تبدیل کرنا چاہتا ہے۔ انہوں نے کہا کہ اس کے لئے امریکہ ایرانی موجودہ قیادت کی تبدیلی کیلئے تمام تر حربے استعمال کر رہا ہے۔ انہوں نے کہا کہ امریکہ اس کے لئے ایران کے خلاف اقتصادی پابندیوں اور ایرانی اپوزیشن فورسز کی معاونت کے دونوں طریقے استعمال کر رہا ہے۔ انہوں نے کہا کہ گزشتہ کئی سالوں سے ہم یہ سن رہے ہیں کہ ایران ایٹم بم تیار کر رہا ہے۔ تاہم ابھی تک اس کا ثبوت سامنے نہیں آیا۔ انہوں نے کہا کہ ایران کے خلاف لگائے جانے والے الزامات بے بنیاد ہیں۔