کائنات میں اسلام نواسہ رسول (ص) کے باعث زندہ ہے، راحت حسین الحسینی

اسلام ٹائمز۔ سات محرم الحرام کی مرکزی مجلس عزاء امام بارگاہ نگرل میں منعقد ہوئی مجلس عزاء سے خطاب کرتے ہوئے آغا سید راحت حسین الحسینی نے کہا کہ امام حسین اگر کربلا کے میدان میں قیام نہ کرتے تو یزید دین اسلام کو سرے سے ختم کرنا چاہتا تھا۔ یزید بھی دین اسلام سے خارج تھا، جس نے اپنی عیاشی کے لیے دین اسلام کو مسخ کرنے کی کوشش کی۔ انہوں نے مزید کہا کہ اگر آج کائنات میں اسلام زندہ ہے تو نواسہ رسول (ص) کے باعث زندہ ہے۔ یزید کا مقصد صرف اور صرف اسلام کا خاتمہ تھا۔ انہوں نے مزید کہا کہ آج معاشرے کے اندر قتل و غارت عروج پر ہے جسکے ذمہ دار حکمران ہیں، اگر وقت کے حکمران دین دار ہوتے تو پورا معاشرہ دین دار ہوتا۔ مجلس عزاء کے بعد جلوس برآمد ہوا جو اپنے مقررہ راستوں سے ہوتا ہوا قزلباش محلہ میں اختتام پذیر ہوا۔