حکومتی اور طالبان کمیٹیوں کا مشترکہ اجلاس کل متوقع ہے، عرفان صدیقی

اسلام ٹائمز۔ طالبان سے مذاکرات کیلئے قائم حکومتی کمیٹی کے کوآرڈینیٹر عرفان صدیقی نے کہا ہے کہ طالبان کمیٹی جہاں کہے گی ملاقات کے لئے تیار ہیں، ہمارے اختیارات سے متعلق اگر خدشات ہیں تو وہ بھی دور کرینگے۔ اسلام آباد سے جاری بیان میں عرفان صدیقی کا کہنا تھا کہ حکومتی اور طالبان کمیٹیوں کا مشترکہ اجلاس کل متوقع ہے، وقت اور جگہ کا تعین ابھی نہیں ہوا۔ انکا کہنا تھا کہ طالبان کمیٹی کے جو بھی خدشات ہیں سامنے آجائیں گے اور انہیں دور کریں گے۔ قوم کے وسیع تر مفاد میں اپنی خدمات پیش کی ہیں۔عرفان صدیقی نے اپنے نام سے جاری کالم کی بھی تردید کی اور کہا کہ جعلی کالم کا مقصد ان کی شہرت کو نقصان پہنچانا ہے۔ انہوں نے کہا کہ ان کے نام کے ساتھ جعلی کالم منسوب کرنا افسوسنا ک ہے۔