اسلام ٹائمز۔ مہتمم مدرسہ جامعہ عثمانیہ شورکوٹ مولانا زاہد انور نے کہا ہے کہ جمعیت علمائے اسلام (ف) کے قائد مولانا فضل الرحمن پر قاتلانہ حملے کے ملزمان کو ابھی تک گرفتار نہیں کیا جا سکا، ملک میں موجود چھوٹی بڑی 20 سے زائد انٹیلی جینس ایجینسیاں کس کام کی ہیں اور وہ کیا کر رہی ہیں، اس سلسلہ میں وزیر داخلہ کی مجرمانہ خاموشی قابل مذمت ہے۔ انہوں نے کہا کہ مولانا پر قاتلانہ حملے کے ذمہ داروں کو بے نقاب کیا جائے۔ یاد رہے کہ جے یو آئی ف کے قائد مولانا فضل الرحمان پر تین دفعہ خود کش حملے ہو چکے ہیں لیکن کسی واقعہ کی تفتیش سے متعلق جے یو آئی کو حکومت نے تفصیلات فراہم نہیں کی ہیں۔ یاد رہے کہ کوئٹہ میں ہونیوالے دھماکے کے بعد سے جے یو آئی کیطرف سے وزیر داخلہ چوھدری نثار علی خان کی برطرفی کا مطالبہ بھی کیا جا رہا ہے۔