اسلام ٹائمز۔ سابق افغان صدر حامد کرزئی نے کہا ہے کہ امریکہ اور اس کے اتحادی افغانستان میں مداخلت کر رہے ہیں، افغانستان میں دہشت گردی اور انتہا پسندی ختم ہونے کے بجائے مزید بڑھ گئی، جس سے افغان عوام بہت متاثر ہو رہے ہیں۔ حامد کرزئی نے روسی اخبار کو انٹرویو دیتے ہوئے کہا کہ دنیا جانتی ہے دہشت گردی کی کمین گاہیں، تربیتی مراکز اور محور افغانستان سے کہیں دور تھے، اس کے باوجود افغان بستیوں پر بم برسائے گئے اور افغان عوام کو جیلوں میں بند کیا گیا، دہشت گردی اور انتہا پسندی ختم ہونے کے بجائے مزید بڑھ گئی ہے۔