اسلام ٹائمز۔ خیبر پختونخوا کے علاقے دیر بالا میں بچوں کے سکول میں بارودی مواد کے دھماکے کے نتیجے میں دو بچے شدید زخمی ہوگئے ہیں۔ ڈوگ درہ کے علاقے میں واقع پرائمری سکول میں زوردار دھماکہ ہوا ہے، جس کی زد میں آکر دو طالب علم زخمی ہوگئے ہیں۔ جنہیں ہسپتال منتقل کیا گیا، جہاں دونوں بچوں کی حالت تشویش ناک بتائی جارہی ہے، جبکہ پولیس کے مطابق سکول کی دیوار کے قریب بیرونی طرف بارودی مواد نصب کیا گیا تھا۔ تاہم دھماکہ ٹائم ڈیوائس کے ذریعے کیا گیا یا ریموٹ کنٹرول، اس حوالے سے کچھ کہنا قبل از وقت ہوگا۔ دھماکے کے بعد سکیورٹی فورسز نے علاقے کو گھیرے میں لے لیا ہے اور تحقیقات شروع کردی گئی ہیں۔