اسلام ٹائمز۔ گلگت بلتستان حکومت کے ترجمان فیض اللہ فراق نے گلگت سے اپنے ایک بیان میں ہے کہ ڈیلی ٹائمز کی فالو اپ سٹوری میں بھی کسی قسم کا ثبوت سامنے نہیں آیا ہے۔ ان کا کہنا تھا کہ رپورٹ میں الزامات کے سواء کچھ بھی نہیں ہے۔ رپورٹر کو اب ثابت کرنا پڑے گا کہ اس کالے دھندے میں جی بی اسمبلی اور کونسل کے اراکین ملوث ہیں۔ انہوں نے کہا کہ ہم اس بات کی سختی سے تردید کرتے ہیں کہ صوبائی حکومت کی جانب سے نہ ہی کسی قسم کی لگژیری آفر دی گئی اور نہ ہی دھمکیاں دی گئی ہیں۔ مذکورہ رپورٹر سستی شہرت کی خاطر جی بی کی عزت کو خاک میں ملانا چاہتا ہے۔ اسے چاہیے کہ تمام تر ثبوت لے کر انکوائری کمیٹی سے سامنے پیش ہو جائے اور ثبوت پیش کرے۔ رپورٹر کی جانب سے موثر ثبوت نہ ملنے کی صورت میں اسے ہرگز معاف نہیں کیا جائے گا۔ ان کا مزید کہنا تھا کہ اگر کسی قسم کے دھندے میں جی بی اسمبلی یا کونسل کے اراکین ملوث پائے گئے تو انہیں بھی ہرگز معاف نہیں کیا جائے گا۔