اسلام ٹائمز۔ وزیر خارجہ خواجہ آصف دوست ملکوں کا دورہ کرکے امریکا کی نئی افغان پالیسی پر پاکستانی موقف سے آگاہ کریں گے۔ ذرائع کے مطابق قومی سلامتی کمیٹی کے اجلاس میں فیصلہ کیا گیا ہے کہ وزیر خارجہ سب سے پہلے چین کا دورہ کریں گے جہاں وہ چینی قیادت سے ملاقاتیں کرکے امریکا کی نئی افغان پالیسی کے حوالے سے پاکستانی موقف سے آگاہ کریں گے۔ اپنے دوروں کے دوران وزیرخارجہ دہشت گردی کیخلاف جنگ میں پاکستان کی قربانیوں سے بھی دنیا کو آگاہ کریں گے۔ پارلیمنٹ ہاؤس کے باہر گفتگو کرتے ہوئے وزیر خارجہ خواجہ آصف کا کہنا تھا کہ امریکا نہ جانے کا فیصلہ نہیں ہوا بلکہ تاحال امریکا کے دورے کی تاریخ طے نہیں ہوئی۔