بلوچستان اسمبلی میں بھارتی آرمی چیف کے بیان کی مذمت

اسلام ٹائمز۔ بھارتی آرمی چیف کے بیان کی بلوچستان اسمبلی کے اجلاس میں شدید مذمت کی گئی ارکان نے کہا کہ مادر وطن کےدفاع کیلئے پوری قوم پاک فوج کے شانہ بشانہ ہے، دشمن نے میلی آنکھ سے دیکھا تو بھرپور جواب دیا جائے گا۔ بلوچستان اسمبلی کے اجلاس میں ارکان نے بھارتی آرمی چیف کے بیان کو آڑے ہاتھوں لیا، کہا کہ بھارت گیدڑ بھبکیوں سے باز آجائے، دشمن نے میلی آنکھ سے دیکھا تو بھرپور جواب دیا جائے گا۔ وزیرداخلہ بلوچستان سلیم کھوسہ امن و امان سے متعلق تحریک التواء پر کہا کہ بلوچستان میں دہشتگردی کے پیچھے بیرونی ہاتھ شامل ہے، کوشش ہے کہ صوبے میں امن قائم کریں۔ اجلاس میں دیگر ارکان نے بھی تحریک التواء پر بحث کرتے ہوئے  کہا کہ  نیشنل ایکشن پلان پر دس فیصد بھی عمل ہو جائے تو امن و امان کی صورتحال میں نمایاں بہتری آئے گی۔