مشترکہ کوششوں سے افغانستان کی تاریخ کا نیا باب شروع ہو گا، سرگئی لاروف

دوسری جانب افغان طالبان کے ترجمان ذبیح اللہ مجاہد نے اے ایف پی کو بتایا کہ وہ کانفرنس میں 5 نمائندگان بھیج رہے ہیں۔
تاہم ان کا کہنا تھا کہ ان کے نمائندگان کابل انتظامیہ کے وفد سے کسی قسم کے مذاکرات نہیں کریں گے۔ طالبان ترجمان کا مزید کہنا تھا کہ یہ کانفرنس کسی فریق سے مذاکرات کرنے کے لیے نہیں بلکہ افغانستان کے مسئلے کے پُرامن حل کے لیے ہے۔

گزشتہ روز روسی وزارت خارجہ کی ترجمان ماریہ زخارووا کا کہنا تھا کہ یہ پہلا موقع ہے کہ طالبان کا وفد اعلیٰ سطح کے بین الاقوامی اجلاس میں شرکت کر رہا ہے۔ خیال رہے کہ طالبان کے روس سے آپریٹ کرنے پر پابندی عائد ہے کیونکہ انہیں ’دہشت گرد‘ قرار دیا جاتا ہے۔

افغانستان میں عسکریت پسندوں کے ساتھ مصالحت کی کوشش کے شعبے کے ترجمان سید احسان طاہری کا کہنا تھا افغان وفد میں اعلیٰ امن کونسل کے 4 نمائندگان شریک ہیں۔ افغان وزارت خارجہ نے اس بات پر زور دیا ہے کہ امن کونسل اجلاس میں افغان حکومت کی نمائندگی نہ کرے۔

دوسری جانب روس کا کہنا ہے کہ اس نے امریکا، بھارت، ایران، چین، پاکستان اور وسطی ایشیا کے 5 سابق سوویت ری پبلکس کو بھی کانفرنس میں شرکت کی دعوت دی ہے۔ علاوہ ازیں ماسکو میں قائم امریکی سفارت خانہ بھی کانفرنس میں بات چیت کا جائزہ لینے کے لیے اپنا نمائندہ بھیجے گا۔