اسلام ٹائمز۔ ایمنسٹی انٹرنیشنل نے کہا ہے کہ افریقی ملک سوڈان میں حکومتی سکیورٹی فورسز کی جانب سے مظاہرین پر فائرنگ کے نتیجے میں کم از کم 37 افراد مارے گئے۔ انسانی حقوق پر نظر رکھنے والی بین الاقوامی تنظیم کے مطابق یہ مظاہرین اختتام ہفتہ پر حکومت کی معاشی پالیسیوں کے خلاف احتجاج کر رہے تھے۔ سوڈانی حکومت نے ملک بھر میں جاری ان مظاہروں کے سبب گذشتہ ہفتے ملک کے دو صوبوں میں ایمرجنسی نافذ کر دی تھی۔ ایمنسٹی کے علاقائی ڈپٹی ڈائریکٹر نے اپنے ایک بیان میں سوڈانی حکومت سے مطالبہ کیا ہے کہ وہ مظاہرین کے خلاف طاقت کا استعمال نہ کرے۔ دوسری جانب سوڈانی صدر عمر حسن البشیر نے ملک میں حالیہ احتجاجی مظاہروں کے بعد وسیع تر اقتصادی اصلاحات متعارف کرانے کے عزم کا اظہار کیا ہے۔