ایم ڈبلیو ایم سندھ کے تحت سالانہ نیاز حلیم، سیاسی و مذہبی رہنماؤں کی شرکت

اسلام ٹائمز۔ مجلس وحدت مسلمین صوبہ سندھ کی جانب سے کراچی کے صوبائی سیکریٹریٹ میں مذہبی، سیاسی جماعتوں، وکلاء، پولیس حکام، دانشوروں، الیکٹرونک، پرنٹ میڈیا، صحافی، تاجر برداری، مساجد و امام بارگاہ کے ٹرسٹیز، اسکاؤٹ تنظیموں، ماتمی انجمنوں کے لئے بیاد شہدائے کربلا نیاز حلیم کا اہتمام کیا گیا۔ جس میں ایم ڈبلیو ایم کے صوبائی رہنما علامہ باقر عباس زیدی، صوبائی رہنما علامہ مبشر حسن، مولانا نشان حیدر، ناصر الحسینی، کراچی ڈویژن کے سیکریٹری جنرل مولانا صادق جعفری، پیپلز پارٹی کے رہنما ذوالفقار قائم خانی، سفیر چکوالی، فرید انصاری، متحدہ قومی موومنٹ کے رہنما قمر عباس رضوی، جماعت اسلامی کے رہنما اسد اللہ بھٹو، پاکستان تحریک انصاف کے رہنما اسد علی شاہ، شیعہ علما کونسل کے رہنما علامہ کامران حیدر عابدی، مسلم لیگ ن کے رہنما خواجہ طارق نذیر، طارق محمود، قادر خان، مولانا منظور الحق تھانوی، پاکستان فلاح پارٹی کے رہنما جنید احمد منشی، محمد شاکر راٹھور، عبدالغفار خانانی، پاکستان عوامی تحریک کے رہنما ظفر اقبال، ذاکرین فاونڈیشن کے علامہ سجاد شبیر رضوی، آل پاکستان سنی تحریک کے رہنما مطلوب اعوان قادری، کراچی بار کونسل کے منیر حیدر ایڈوکیٹ، جاوید ایڈوکیٹ، تقی ایڈوکیٹ، صحافی برادری سے سمیر قریشی، ندیم صدیقی، الطاف مجاہد، شکیل زکی، منیر حسین کھوکھر، مہاجر اتحاد تحریک سے ڈاکٹر سلیم حیدر، پیس ایمبسڈر ویلفیئر آرگنائزیشن کے صدر اورنگزیب سلطان، ہم عوام پاکستان پارٹی کے رہنما امداد حسین نقوی، ساجد ظفر، کرنل (ر) ڈاکٹر علی، پاکستان بشب کونسل کے بشپ خادم بھٹو، ناتھا فاؤنڈیشن کے رمضان ناتھا، معروف نعت خواں حکیم فیض سلطان سمیت دیگر جماعتوں کے رہنماؤں نے شرکت کی۔

نیاز حلیم کے موقع پر خطاب کرتے ہوئے ایم ڈبلیو ایم کے رہنما علامہ باقر زیدی نے کہا کہ کربلا کے شہیدوں کی یاد منانا اس دور میں افضل ترین عمل ہے کیونکہ ظالم سے نفرت اور مظلوم کی حمایت کو جو درس امام حسین علیہ السلام اور ان کے جانثار ساتھیوں نے اپنے شہادت کے ذریعے پیش کیا ہے وہ تاقیامت زندہ رہے گا۔ ان کا کہنا تھا کہ ہم تمام محب وطن جماعتوں سمیت تمام حلقوں کو دعوت دیتے ہیں کہ پاکستان کی سالمیت کی خاطر ہم آواز ہوکر وطن عزیز کو تکفیریت اور دہشت گردی سے پاک کرنے کیلئے اپنی کوششیں کو مزید تیز کریں۔ انہوں نے کہا کہ اندرونی اور بیرونی چیلنجز سے نمٹنے کیلئے پاکستان کی تمام محب وطن قوتوں کو اکھٹا ہونا ہوگا، راہ اہل بیت (ع) کو زندہ رکھ کر ہی پاکستان کی سالمیت کو یقینی بنایا جاسکتا ہے۔