اسلام ٹائمز۔ پنجاب میں افغان باشندوں سمیت غیرقانونی مقیم غیر ملکیوں کے انخلاء کیلئے کوششیں تیز کر دی گئی ہیں۔ محکمہ داخلہ نے غیر قانونی غیر ملکیوں کو ملک سے نکالنے کی دوبارہ ہدایات جاری کر دی ہیں۔ تفصیلات کے مطابق محکمہ داخلہ پنجاب نے صوبے میں مقیم غیر قانونی غیر ملکیوں کو ملک سے نکالنے کی مہم تیز کر دی ہے، تمام غیرقانونی غیر ملکیوں کیخلاف مہم آج سے شروع کی جا رہی ہے۔ ہوم سیکرٹری پنجاب نورالامین مینگل کا کہنا ہے کہ یہ مہم آج قانونی طور پر مقیم افغانیوں کیخلاف نہیں ہوگی، بلکہ ایسے افراد جو پاکستان میں غیر قانونی طور پر مقیم ہیں، ان کے انخلاء کیلئے ہوگی۔ انہوں نے بتایا کہ غیرقانونی مقیم غیرملکیوں کو گرفتار کرکے ان کے ملک بھیج دیا جائے گا۔