اسلام ٹائمز۔ فلسطین کی وزارت صحت نے گذشتہ 24 گھنٹوں کے دوران درجنوں فلسطینیوں کے شہید اور زخمی ہونے کا اعلان کیا ہے۔ فارس نیوز ایجنسی انٹرنیشنل کے انٹرنیشنل ڈیسک کے مطابق فلسطینی وزارت صحت نے اعلان کیا ہے کہ غزہ کی پٹی میں شہداء کی تعداد 34 ہزار 151 اور زخمیوں کی تعداد 77 ہزار 84 تک پہنچ گئی ہے۔ وزارت صحت کے بیان میں کہا گیا ہے کہ قابض فوج نے گذشتہ 24 گھنٹوں کے دوران 6 نئے جرائم کا ارتکاب کیا اور 54 افراد کو شہید جبکہ 104 کو زخمی کیا اور ہزاروں لوگ اب بھی صہیونی بمباری کی وجہ سے ملبے تلے دبے ہوئے ہیں اور انہیں نکالنا یا امداد فراہم کرنا ممکن نہیں ہے۔
غزہ کی جنگ کو 199 دن گزر چکے ہیں اور اسرائیلی فوج غزہ کی پٹی کے عوام کو بھوک سے مرنے کی پالیسی کے ساتھ ساتھ اب بھی اس کے مختلف علاقوں پر بمباری کر رہی ہے۔ گذشتہ رات فلسطینی وزارت صحت کے ترجمان اشرف القدرہ نے اعلان کیا کہ صیہونی حکومت میدان میں فلسطینیوں کو پھانسی دینے کے بعد شہداء کے جسم کے اعضاء چرا لیتی ہے۔ انہوں نے مزید کہا کہ قابض روزانہ 172 فلسطینیوں کو قتل کرتے ہیں، جن میں سے 70 بچے ہیں۔ غزہ میں متعدد اجتماعی قبروں کی دریافت اسرائیل کی نسل کشی کا ثبوت ہے۔