اسلام ٹائمز۔ آزاد کشمیر قانون ساز اسمبلی کے سپیکر سردار غلام صادق نے کہا ہے کہ رسول اکرم (ص) کی شان کے خلاف امریکہ میں یہودی اور عیسائی لابیوں کی کاروائیاں قابل مذمت ہیں مسلمان ہر قسم کے مظالم تو برداشت کر سکتے ہیں لیکن نبی کریم (ص) کی شان میں گستاخی اور قرآن پاک کی بے حرمتی کسی صورت قابل برداشت نہیں۔ مغرب کو اپنے رویے کو تبدیل کرنا ہوگا۔ ملت اسلامیہ میں جاری تشویش کی لہر کو ختم کرنے کے لیے یہودی فلم ساز کو سزا دینی چاہیے۔
سردار غلام صادق نے کہا کہ ایسی ناپاک حرکتوں سے امریکہ اور مغرب کی رسوائی ہو رہی ہے۔ مسلمانوں میں نفرت کے بیج بوئے جا رہے ہیں جن کی فصل ان کو کاٹنا پڑے گی۔ انھوں نے کہا کہ دنیا بھر میں امریکہ اور مغرب بدامنی کا سبب ہیں۔ افغانستان سمیت دیگر ملکوں سے غیرملکی فوج واپس جانی چاہیے۔ امریکہ کی دوہری پالیسی ناقابل فہم ہے فلسطین اور کشمیر کے مسلمانوں کو ان کا پیدائشی حق دیا جائے۔ دہشت گردی کی آڑ میں مغربی طاقتوں نے پاکستان کو ناقابل تلافی معاشی نقصان پہنچایا ہے۔