علامہ سبیل حسن مظاہری ایک مرتبہ پھر مجلس وحدت مسلمین خیبر پختونخوا کے سیکرٹری جنرل منتخب

اسلام ٹائمز۔ علامہ سبیل حسن مظاہری ایک مرتبہ پھر آئندہ تین سال کیلئے مجلس وحدت مسلمین خیبر پختونخوا کے سیکرٹری جنرل منتخب ہوگئے ہیں۔ اس سلسلے میں پشاور کی امام بارگاہ حاجی ملک رحمان میں ’’افکار خمینی (رح)‘‘ کنونش منعقد ہوا۔ جس میں صوبہ خیبر پختونخوا کے مختلف اضلاع، کرم ایجنسی اور اورکزئی ایجنسی سے تنظیمی مسئولین نے شرکت کی، جبکہ صوبائی کابینہ کے علاوہ مجلس وحدت مسلمین پاکستان کے مرکزی ڈپٹی سیکرٹری جنرل علامہ محمد امین شہیدی، رکن مرکزی شوریٰ عالی علامہ سید جواد حسین ہادی، رکن مرکزی شوریٰ عالی خادم حسین اعوان، مرکزی سیکرٹری روابط ملک اقرار حسین اور عابد بہشتی نے خصوصی شرکت کی۔ کنونشن کے دوران نئے صوبائی سیکرٹری جنرل کے لئے تین نام پیش کئے گئے۔ جن میں علامہ سبیل حسن مظاہری، علامہ ارشاد علی اور علامہ سید عبدالحسین الحسینی کا نام شامل تھا۔ اس موقع پر تمام اضلاع کے مسئولین اور صوبائی کابینہ نے ووٹنگ میں حصہ لیا۔ جس کے نتیجے میں علامہ سیبل حسن مظاہری کثرت رائے سے ایک مرتبہ پھر آئندہ 3 سال کیلئے مجلس وحدت مسلمین خیبر پختونخوا کے سیکرٹری جنرل منتخب ہوگئے۔ اس موقع پر علامہ سید حسین الاصغر نے نئے سیکرٹری جنرل سے ان کے عہدے کا حلف لیا۔