امریکہ کا مسلم ممالک میں آمریت کی حمایت کرنا انتہاء پسندی کا باعث بن رہا ہے، مشاہد حسین

اسلام ٹائمز۔ سینیٹر مشاہد حسین سید کا کہنا ہے کہ دنیا میں اسلام مخالف جذبات ہیں نہیں بلکہ انہیں بھڑکایا جا رہا ہے۔ اسلام آباد میں انسداد انتہاء پسندی کانفرنس سے خطاب کرتے ہوئے مشاہد حسین سید کا کہنا تھا کہ پاکستان اپنی غلطیوں کو ٹھیک کر رہا ہے اور آرمی چیف جنرل راحیل کی واضح پالیسیوں کی وجہ سے پاک فوج دہشت گردی کی جنگ میں کامیابیاں حاصل کر رہی ہے۔ مسلم لیگ (ق) کے رہنماء کا کہنا تھا کہ دہشت گردی اور انتہاء پسندی کو سیاسی نظر سے دیکھنا چاہئے، دہشتگردی صرف مسلم ممالک نہیں پوری دنیا کا مسئلہ بن چکا ہے، دنیا میں اسلام مخالف جذبات ہیں نہیں بلکہ بھڑکائے جا رہے ہیں، امریکا کا مسلم ممالک میں آمریت کی حمایت کرنے کا رویہ بھی انتہاء پسندی کا باعث بن رہا ہے، امریکا مسلم دنیا میں آمریت کی حوصلہ افزائی ختم کرے۔ ان کا کہنا تھا کہ بھارت نے مسئلہ کشمیر کے حل کے لئے کبھی سنجیدہ کوشش نہیں کی۔