سکردو، سالانہ تقریب نتائج امتحانات و تقسیم انعامات(1)

اسلام ٹائمز۔ جامعۃ النجف سکردو (بَلتستان) میں سالانہ تقریب تقسیم انعامات و نتائج امتحانات کے سلسلے میں ایک پروقار تقریب منعقد ہوئی۔ اس تقریب کی صدارت مدیر جامعۃالنجف حجۃ الاسلام شیخ محمد علی توحیدی نے کی جبکہ حجۃ الاسلام سید مصطفیٰ شاہ موسوی، جناب محمد حسن حسرت اور ڈاکٹر پروفیسر محمد ریاض رضی مہمان خصوصی تھے۔ نظامت کے فرائض حجۃ الاسلام محمد اشرف مظہر نے انجام دیئے۔ قاری عرفان حیدر نے تلاوت کلام مجید اور مولانا حسین بشیر نے نعت رسول مقبول (ص) سے محفل کو منور کیا۔ سینیئر طالب علم محمد ذاکر نے طلباء کی نمائندگی میں عالمانہ اظہار خیال کیا۔ محقق، ادیب، دانشور اور سماجی شخصیت جناب محمد حسن حسرت نے اظہار خیال کرتے ہوئے جامعۃالنجف سکردو (بَلتستان) کو ایک ممتاز تعلیمی ادارہ قرار دیا، جو دینی علوم کے علاوہ معاشرتی ضرورت کے دیگر بہت سے شعبوں میں بھی نوجوان نسل کو پروان چڑھا رہی ہے۔ انہوں نے کہا کہ جامعۃالنجف کے بہت سے فارغ التحصیل طلباء اعلیٰ یونیورسٹیوں سے پی ایچ ڈی کرکے ملکی اور عالمی سطح پر دین و ملت کی خدمت میں مصروف ہیں۔

معروف عالم دین حجۃ الاسلام آغا سید مصطفیٰ شاہ موسوی نے اپنے خطاب میں طلباء پر زور دیا کہ وہ اسلام کے عملی مبلغ بنیں اور اپنے اعمال و کردار کو دنیا کے لیے نمونہ عمل بنائیں۔ جامعہ کے مدیر آقائے توحیدی نے طالب علموں کی انفرادی اور اجتماعی ذمہ داریوں اور اہداف پر حکیمانہ گفتگو کرتے ہوئے کہا کہ "ملاّ کی دوڑ مسجد تک" کا نعرہ استعماری تھا۔ امام خمینی رحمۃ اللہ علیہ کے عظیم انقلاب کی کامیابی کے بعد یہ استعماری نعرہ دفن ہوچکا ہے، اس عظیم انقلاب کے ثمرات میں سے یہ بھی ہے کہ علماء ہر شعبہ ہائے زندگی میں اپنی ذمہ داریاں نبھا رہے ہیں۔ اس تقریب میں جامعہ کے پرنسپل اور مہمانان گرامی نے مختلف شعبوں میں پوزیشن لینے والے طلباء کے علاوہ مختلف خدمات کے حامل اساتید، مسئوولین اور مہمانان گرامی کو تحائف اور شیلڈز پیش کیں۔

انعامات عطا کرنے والوں میں مدیر جامعہ آقائے توحیدی، جناب آقائے سید مصطفیٰ شاہ موسوی، جناب آقائے سجاد حسین مفتی، جناب محمد حسن حسرت، جناب ڈاکٹر محمد ریاض رضی، جناب آقائے سید احمد موسوی، جناب آقائے ملکوتی، جناب آقائے جعفری، جناب شیخ امین اللہ، جناب آغا زمانی، جناب زاہد علی خان، جناب ڈاکٹر محمد ذاکر رضوان اور جناب مولانا حسنین رضا حیدری شامل تھے۔ اس تقریب میں درج ذیل طلباء نے نصابی اور ہم نصابی سرگرمیوں میں پہلی پوزیشن حاصل کی۔ شجاعت علی لمعہ اول، کرامت مصطفیٰ منطق اول، عقیل عباس نوری ہدایہ صمدیہ، محمد عباس کھرمنگی صرف میر، حافظ حامد حسین مبتدی، علی محمد، محمد ذاکر، محمد نذیر، اکبر حسین، حسن بشیر، حسین بشیر اور غلام مہدی۔ آخر میں اسلام کی سربلندی، دشمنان اسلام کی نابودی، مملکت خداداد پاکستان کی سلامتی اور تعجیل امام زمانہ (عج) کی دعا کے ساتھ یہ تقریب اختتام پذیر ہوئی۔