اسلام ٹائمز۔ مجلس وحدت مسلمین پاکستان کے سیکرٹری جنرل علامہ راجہ ناصر عباس جعفری نے جنوبی پنجاب کے ضلع لیہ کا دورہ کیا، اس موقع پر ان کا شاندار استقبال کیا گیا، علامہ ناصر عباس جعفری کیساتھ مرکزی سیکرٹری شعبہ تبلیغات علامہ اعجاز حسین بیشتی، مرکزی سیکرٹری تنظیم سازی یعقوب حسینی، مرکزی سیکرٹری روابط اقرار حسین ملک، صوبہ پنجاب کے سیکرٹری جنرل علامہ عبدالخالق اسدی اور پنجاب کے ترجمان علامہ اصغر عسکری موجود تھے۔ علامہ ناصر عباس جعفری کو استبقالی ریلی کی صورت میں تحصیل چوبارہ سے چوک اعظم لایا گیا، جہاں انہوں نے امام رضا کمپلیکس میں اجتماع سے خطاب کیا، اس کے بعد استقبالی قافلہ لیہ شہر سے ہوتے ہوئے اللہ یار پہنچا، جہاں علامہ ناصر عباس جعفری نے سالانہ مجلس عزاء کے ایک بڑے اجتماع سے خطاب کیا۔
