ڈی آئی خان، جے یو آئی (ف) کی غلبہ اسلام کانفرنس

اسلام ٹائمز۔ ڈیرہ اسماعیل خان کے حق نواز پارک میں جمعیت علمائے اسلام کے زیر اہتمام غلبہ اسلام کانفرنس کا انعقاد کیا گیا۔ جس میں جے یو آئی کے مختلف مرکزی، صوبائی اور مقامی قائدین نے خطاب کیا۔ غلبہ اسلام کانفرنس کے انتظامات دو دن قبل ہی شروع کردیئے گئے تھے، سرکلر روڈ پہ بینرز اور پینا فلیکسز آویزاں تھے، کانفرنس میں ڈیرہ کے مضافاتی دیہی علاقوں سے عوام اور مدارس کے طلبہ نے کثیر تعداد میں شرکت کی۔ کانفرنس سے خطاب کرتے ہوئے مولانا فضل الرحمن نے کہا کہ ہمارے اکابرین کو طعنہ دیا کہ علماء تو خود ایک اسلام پر متحد نہیں تو وہ ہمیں کس اسلام کی راہنمائی کر سکتے ہیں۔ ہمارے اکابرین نے اس چیلنج کو قبول کیا اور باہمی اتحاد سے اسلام کی تعریف بیان کی جو آج بھی ایمان کا حصہ ہے۔ آج ایک پھر منظم طریقے سے مذہبی جماعتوں کو دیوار سے لگانے کی کوشش کی جا رہی ہے لیکن ہم نے متحدہ مجلس عمل کے قیام سے ان سازشوں کو ناکام بنا دیا ہے۔ ادارے آج انصاف دینے کی بات کر رہے ہیں لیکن یہ کیسا انصاف ہے کہ ایک منتخب وزیر اعظم کو تو کان سے پکڑ کر گھر بھیج دیا جاتا ہے لیکن خیبر پختونخواہ کے وزیر اعلیٰ کے خلاف خود اسی کی جماعت کے منتخب اراکین پریس کانفرنس کر کے اسکی کرپشن کے ثبوت لہراتے ہیں لیکن انصاف دینے والوں کے کان پہ جوں تک نہیں رینگتی۔ انہوں نے دعویٰ کیا کہ گزشتہ پانچ سال کے دوران خیبر پختونخواہ کے عوام نے جو مشکل حالات دیکھے ہیں، 2018ء کے بعد ان تمام مسائل کا حل لے کر متحدہ مجلس عمل حکومت بنائے گی۔