اسلام ٹائمز۔ وفاقی وزیر ریلوے خواجہ سعد رفیق نے کہا ہے کہ طالبان حکومت کی طرف سے صلح کی پیش کش کو کمزوری نہ سمجھیں، ریاست بے گناہ شہریوں کے خون پر ردعمل ظاہر کرے گی۔ وفاقی وزیر ریلوے خواجہ سعد رفیق نے گورنر خیبر پختونخوا انجینئر شوکت اللہ کے ہمراہ بشپ آف پشاور سے ملاقات کی۔ اس موقع پر میڈیا کے نمائندوں سے بات چیت کرتے ہوئے سعد رفیق نے کہا کہ کوہاٹی چرچ پر حملہ وحشیانہ عمل ہے۔ ان کا کہنا تھا کہ مذاکرات بچوں کا کھیل نہیں، انتہائی حساس معاملہ ہے اور حکومت کو کوئی مجبور نہ کرے، وہ کسی کے کہنے پر دفتر کھولے اور طالبان سے مذاکرات کرے۔ وفاقی وزیر ریلوے نے کہا کہ طالبان حکومت کی طرف سے صلح کی پیش کش کو کمزوری نہ سمجھیں، ہم مسئلے کا حل آئین کے تحت چاہتے ہیں۔