سرکاری ملازمین کے سکیل 1 تا 10 کی ہیلتھ اور لائف انشورنس کرائی جائے گی، وزیراعلٰی جی بی

اسلام ٹائمز۔ وزیراعلٰی گلگت بلتستا ن حافظ حفیظ الرحمٰن نے کہا ہے کہ سرکاری ملازمین کی ویلفیئر کیلئے حکومت اقدامات کررہی ہے۔ جس کے تحت سکیل  1 تا 10 کے ملازمین کی ہیلتھ اور لائف انشورنس اور سکیل 10 سے اوپر کے ملازمین کی صرف ہیلتھ انشورنس کرائی جائے گی۔ اس منصوبے سے سپیشل پے سکیل کے ملازمین کا ہیلتھ انشورنس اور لائف انشورنس ہوگی۔ حافظ حفیظ الرحمٰن نے کہا ہے کہ اس حوالے سے ملازمین کے تمام سٹیک ہولڈرز سے بات چیت کی گئی ہے۔ صوبے میں جلد انشورنس ایکٹ لایا جائے گا۔ آئندہ کابینہ اجلاس میں انشورنس ایکٹ کا مسودہ پیش کیا جائے گا۔ انشورنس ایکٹ کے تحت صوبے کے تمام افراد کی انشورنس لازمی قرار دی جائے گی۔ نادار اور غریب لوگوں کی انشورنس حکومت گلگت بلتستان کرائے گی۔