ڈی آئی خان، سکیورٹی فورسز کی کارروائی، خاتون سمیت 5 دہشتگرد ہلاک

اسلام ٹائمز۔ ڈیرہ اسماعیل خان کی تحصیل کلاچی کے علاقہ باچہ آباد میں سکیورٹی فورسز اور دہشت گردوں میں فائرنگ کا تبادلہ ہوا ہے، جس میں خاتون سمیت 5 خطرناک دہشت گرد ہلاک ہوئے ہیں، جن میں سے تین دہشت گردوں کی شناخت کر لی گئی ہے۔ آپریشن کے دوران دیگر دہشت گرد قریبی جنگل میں فرار ہوگئے، جن کی تلاش کیلئے سکیورٹی فورسز کا آپریشن جاری ہے۔ مقامی ذرائع کے مطابق دہشت گردوں کی موجودگی کی اطلاع پر کلاچی کے علاقہ باچہ آباد اور آس پاس جنگلوں میں سکیورٹی فورسز نے آپریشن کیا۔ آپریشن کے دوران فورسز پر دہشت گردوں کی جانب سے مختلف اطراف سے فائرنگ شروع کر دی گئی۔ سکیورٹی فورسز کی بھرپور جوابی کارروائی کے نتیجے میں دہشتگردوں نے پسپائی اختیار کی۔

جوابی کارروائی کے نتیجے میں خاتون سمیت 5 دہشتگرد موقع پہ ہی ہلاک ہوگئے، جن میں سے تین کی شناخت محمد جاوید ولد غلام فرید سکنہ پکہ ملانا ڈیرہ اسماعیل خان، حسیب الرحمان ولد حفیظ الرحمان سکنہ تونسہ شریف ڈیرہ غازی خان، محمد عبداللہ ولد اللہ دتہ سکنہ تونسہ شریف ڈیرہ غازی خان کے نام سے کی گئی، جو کہ پولیس موبائل پروا پر حملہ کرنے سمیت فورسز پر حملوں کی متعدد کارروائیوں میں ملوث ہونے کے ساتھ ساتھ دہشتگردی کے مختلف آٹھ مقدمات میں مطلوب تھے۔ مرنے والے دیگر دو دہشتگردوں کی شناخت نہیں ہوسکی۔ دہشتگردوں کے قبضے سے لائیٹ مشین گنز رائفلیں، پولیس وائرلیس سیٹ، دستی بم، خودکش جیکٹس میں استعمال ہونے والا سامان شامل تھا۔ دہشتگردوں کے ساتھی قریبی جنگل میں فرار ہوچکے ہیں، جن کی تلاش کیلئے تاحال آپریشن جاری ہے۔