جی بی میں 493 ملین روپے مالیت کا فش فارمنگ کا منصوبہ شروع

اسلام ٹائمز۔ جی بی میں 493 ملین روپے مالیت کا فش فارمنگ کا منصوبہ شروع کر دیا گیا، وفاقی وزیر برائے قومی فوڈ سکیورٹی اینڈ ریسرچ صاحبزادہ محمد محبوب سلطان نے سکردو میں منصوبے کا افتتاح کیا۔ ادھر گلگت میں وزیراعظم کے زراعت ہنگامی پروگرام کے تحت جی بی کے واٹر کورسز کی بہتری کے لئے قومی پروگرام کی افتتاحی تقریب میں گورنر، وزیراعلٰی جی بی، صوبائی وزیر اور سیکرٹری برائے فشریز اینڈ لائیو اسٹاک، چیف سیکرٹری جی بی اور پی ٹی آئی کے مرکزی رہنما جہانگیر خان ترین نے شرکت کی۔ وفاقی وزیر نے اس موقع پر کہا کہ پاکستان کو تازہ پانی کے ذخائر سے نوازا گیا ہے اور اس میں 1100 کلومیٹر طویل ساحل ہے جو مچھلی کی کاشت اور آبی زراعت کی ترقی کے لئے مثالی ہے۔ بدقسمتی سے پانی کے ان قدرتی وسائل کو زیادہ سے زیادہ سطح تک استعمال نہیں کیا جا سکتا۔ اس سے نہ صرف پاکستان کی تجارت متاثر ہوئی ہے بلکہ پاکستان اور دنیا کے باقی انسانوں میں فی کس مچھلی کے استعمال میں خاصا فرق ہے۔ اب تک ہم پاکستان میں سمندری آبی زراعت کی ترقی سے قاصر ہیں۔ یہ بات بہت حوصلہ افزاء ہے کہ آنے والی حکومت زراعت، ماہی گیری اور سیاحت پر خصوصی توجہ دے رہی ہے۔