گوگل اور فیس بک کا دباوء، نئے سوشل میڈیا قانون پر عمل درآمد روکنے کا فیصلہ

اسلام ٹائمز۔ مقامی میڈیا اور عالمی سوشل میڈیا گروپس کے دباؤ پر حکومت نے ایک اور یوٹرن لے لیا اور نئے سوشل میڈیا قانون پر عمل درآمد روکنے کا فیصلہ کرلیا۔ ایشیائی انٹرنیٹ کولیش گروپ (اے آئی سی) نے سوشل میڈیا ریگولیش کے حوالے سے وزیراعظم پاکستان عمران خان کو خط لکھا جس میں کہا گیا ہے کہ پاکستان میں سوشل میڈیا سے متعلق نئے قوانین پر عمل اے آئی سی کے لیے مشکل ہے۔ خط کے مطابق اِن قوانین سے عام صارف اور کاروباری حضرات بھی متاثر ہوں گے جبکہ گوگل، فیس بک اور ٹوئٹرسروس بند ہونے سے 7 کروڑ صارف متاثر ہوں گے۔ ذرائع کے مطابق 15 فروری کو ایشیائی انٹرنیٹ کولیشن گروپ کے نئے سوشل میڈیا قوانین پر لکھے گئے سخت تحفظات کے خط اور ملک میں صحافتی اور سوشل میڈیا تنظمیوں کے احتجاج کے بعد وزیراعظم نے ان قوانین پر نظرثانی کی ہدایت کی ہے۔

ذرائع کاکہنا ہےکہ وفاقی حکومت نے نئے سوشل میڈیا قوانین پر عمل درآمد روکنے کا فیصلہ کیا ہے اور نئے سوشل میڈیا قوانین پر نظرثانی اور متعلقہ اسٹیک ہولڈرز سے مشاورت کے لیے چیئرمین پاکستان ٹیلی کمیونیکیشن اتھارٹی (پی ٹی اے) میجر جنرل ریٹائرڈ عامر عظیم باجوہ کی سربراہی میں 4 رکنی کمیٹی قائم کردی ہے جو 2 ہفتوں میں وزیراعظم کو اپنی رپورٹ پیش کرے گی۔ ذرائع نے بتایا کہ ڈیجیٹل پاکستان کی سربراہ تانیہ ایدرس، سوشل میڈیا فوکل پرسن ڈاکٹر ارسلان اور ایڈیشنل سیکرٹری وزارت آئی ٹی بھی کمیٹی کا حصہ ہوں گے۔ وفاقی حکومت کی قائم کردہ کمیٹی تمام شراکت داروں سے وسیع مشاورت کرے گی جبکہ ذرائع کا کہنا ہےکہ مشاورتی عمل میں وزیر انسانی حقوق شیریں مزاری اور بیرسٹر علی ظفر کو بھی شامل کیا جائے گا۔ وزارت آئی ٹی حکام نے نئے سوشل میڈیا قوانین کے جائزہ کے لیے کمیٹی کی تشکیل کی تصدیق کرتے ہوئے بتایاکہ نئے سوشل میڈیا قوانین پر عمل درآمد روک کر 4 رکنی کمیٹی بنادی گئی ہے جو پیر سے مشاورتی عمل شروع کرکے ان قوانین کاجائزہ لے گی۔

خیال رہے کہ گزشتہ دنوں وفاقی کابینہ نے نئے سوشل میڈیا قوانین کی منظوری دی تھی۔ نئے قوانین کے مطابق تمام عالمی سوشل میڈیا پلیٹ فارمز کی 3 ماہ میں پاکستان میں رجسٹریشن لازمی قرار دی گئی تھی جس کے تحت یوٹیوب، فیس بک، ٹوئٹر، ٹِک ٹاک اور ڈیلی موشن سمیت دیگر تمام کمپنیوں کو 3 ماہ میں رجسٹریشن کرانا ہوگی۔ نئے قواعد کی رو سے تمام سوشل میڈیا کمپنیوں کے لیے 3 ماہ میں اسلام آباد میں اپنا دفتر قائم کرنا لازمی قرار دیا گیا ہے جب کہ ان پر پاکستان میں رابطہ افسر تعینات کرنے کی شرط بھی عائد کی گئی ہے۔ نئے قوانین کے تحت یوٹیوب سمیت سوشل میڈیا پربنائے جانےوالے مقامی پلیٹ فارمز کی رجسٹریشن کرانا لازمی قرار دی گئی ہے۔