اسلام ٹائمز۔ دہلی حکومت نے جمعرات کو دارالحکومت نئی دہلی میں ڈیزل پر ویلیو ایڈڈ ٹیکس (وی اے ٹی) 30 سے کم کرتے ہوئے 16.75 فیصد کرنے کا اعلان کیا ہے، جس سے اس ایندھن کی قیمت فی لیٹر 8.36 روپے کم ہو جائے گی۔ دہلی کے وزیراعلٰی اروند کیجریوال نے ریاستی کابینہ کی میٹنگ میں کئے گئے اس فیصلے کا اعلان کیا۔ اروند کیجریوال نے کہا کہ دہلی میں ڈیزل پر وی اے ٹی 30 فیصد سے کم کر کے 16.75 فیصد کردیا گیا ہے۔ انہوں نے کہا کہ اس فیصلے سے دہلی میں ڈیزل کی قیمت 82 روپے سے 8.36 روپے کم ہوکر 73.64 روپے فی لیٹر ہوجائے گی۔ ہمسایہ ریاستوں کے مقابلے میں وی اے ٹی زیادہ ہونے سے ڈیزل کافی مہنگا تھا۔ ٹرانسپورٹرس ڈیزل پر وی اے ٹی کم کرنے کا مسلسل مطالبہ کر رہے تھے۔