ایران اور افغانستان کے صدور سہ فریقی سربراہ اجلاس میں شرکت کیلئے آج پاکستان پہنچیں گے

اسلام ٹائمز۔ آج اسلام آباد ميں دو روزہ پاک افغان ايران سہ فريقی اجلاس شروع ہو رہا ہے، جس ميں انسداد دہشتگردي ميں تعاون، طالبان کے ساتھ امن مذاکرات سميت ديگر معاملات پر غور کيا جائے گا۔ غيرملکی خبرايجنسی کے مطابق سہ فريقی اجلاس ميں شرکت کے ليے افغان صدر حامد کرزئی اور ايرانی صدر احمدی نژاد آج اسلام آباد پہنچيں گے۔ خبر ايجنسی نے پاکستانی افسر کے حوالے سے کہا ہے کہ سہ فريقی اجلاس ميں انسداد دہشتگردی ميں تعاون، انسانی اسمگلنگ، منشيات اسمگلنگ اور سرحدی معاملات پر بات چيت ہو گی، خبرايجنسی کے مطابق اجلاس ميں طالبان کے ساتھ امن مذاکرات سميت ديگر معاملات پر بھي بات چيت کي جائے گی۔
 
دیگر ذرائع کے مطابق ہمسایہ ممالک ایران اور افغانستان کے صدور سہ فریقی اجلاس میں شرکت کے لیے جمعرات کو پاکستان پہنچیں گے۔ ایران کے صدر محمود احمدی نژاد اور افغان صدر حامد کرزئی اپنے دورے کے دوران پاکستانی رہنماوں سے ہونے والی ملاقاتوں میں دوطرفہ تعلقات اور خطے کی صورتحال سمیت دیگر اہم امور پر تبادلہ خیال کریں گے۔ میڈیا رپورٹس کے مطابق افغان صدر حامد کرزئی پاکستانی قیادت پر زور دیں گے کہ پاکستانی سینئر طالبان قیادت تک رسائی ممکن بنائی جائے اور افغان حکام کو توقع ہے کہ پاکستان افغان لیڈروں کی طالبان سینئر قیادت سے بامعنی ملاقات کا اہتمام کرے گا۔ دریں اثناء ایران کے صدر محمود احمدی نژاد کے دورہ پاکستان کے دوران توانائی سمیت مختلف شعبوں میں تعاون بڑھانے کے لیے اہم پیش رفت کی توقع ہے، گزشتہ روز ایرانی سفیر علی رضا نے پانی و بجلی کے وزیر نوید قمر سے ملاقات کے دوران کہا کہ پاکستان اور ایران دوطرفہ تعلقات کو مضبوط بنانے کے لیے ایران سے بجلی کی درآمد سمیت تجارت اور معیشت میں تعاون کے فروغ پر رضامند ہو گئے ہیں۔