اسلام ٹائمز۔ سیرت فاطمتہ الزھرا س ہر دور کے طاغوت کے خلاف قیام و احتجاج کا نام ہے۔ ان خیالات کا اظہار ایم ڈبلیو ایم پنجاب کے ڈپٹی سیکرٹری جنرل علامہ اصغر عسکری نے مسجد و امام بارگاہ الصادق ع اسلام آباد میں الصادق ٹرسٹ کے زیراہتمام منعقدہ محفل میلاد خاتون جنت بی بی فاطمتہ الزھرا س سے خطاب کرتے ہوئے کیا۔ انہوں نے کہا کہ سیدہ زھرا س کا کردار عالمین کی عورتوں کے لئے مشعل راہ ہے، یہی وجہ ہے کہ امام خمینی رہ نے اس مبارک دن کو یوم خواتین قرار دیا ہے۔ انہوں نے کہا کہ نہ صرف خواتین بلکہ ہر دور کے مرد و زن کے لئے طاغوت کے خلاف قیام و احتجاج بھی سیرت فاطمتہ الزھرا س ہی کا خاصا ہے۔ انہوں نے کہا کہ ہم سب کو شکر ادا کرنا چاہئیے کہ ہمیں ولایت علی ع اور مودت اہل بیت ع کی نعمت میسر ہے، جس کا کوئی نعم البدل نہیں اور دنیا کی کوئی بھی چیز اس کا مقابلہ نہیں کرسکتی۔ محفل میلاد میں اسلام آباد و راولپنڈی کے مشہور شعرائے کرام نے بھی سیرت زھرا س کے حوالے سے کلام پیش کئے۔