وقت گذرنے کیساتھ ساتھ پاک سعودی تعلقات مزید مضبوط ہوتے جا رہے ہیں، سعودی سفیر

اسلام ٹائمز۔ سعودی سفیر عبدالعزیز بن ابراہیم الغدیر نے کہا ہے کہ پاکستان کے ساتھ تھے، ساتھ ہیں اور ساتھ رہیں گے۔ گیارہ مئی کے انتخابات کے بعد پاکستان میں اب جو بھی حکومت بنے گی، سعودی عرب اُس سے بھرپور تعاون کرے گا۔ لوک ورثہ اسلام آباد میں سعودی گیلری کے افتتاح کے موقع پر میڈیا سے بات چیت کرتے ہوئے سعودی سفیر کا کہنا تھا کہ حالات کیسے بھی کیوں نہ ہوں، سعودی حکومت اور عوام پاکستان کے ساتھ ہیں۔ عام انتخابات کے بعد اب پاکستان 
 میں جو بھی نئی حکومت بنے گی، اس سے بھرپور تعاون کریں گے۔ عبدالعزیز بن ابراہیم الغدیر نے مزید کہا کہ وقت گذرنے کے ساتھ ساتھ پاک سعودی تعلقات مزید مضبوط ہوتے جا رہے ہیں۔ انہوں نے بتایا کہ سعودی حکومت کی جانب سے پاکستانی سیلاب زدہ علاقوں میں 5 ہزار مکانات کی تعمیر مکمل کر لی گئی ہے۔