طالبان نے جان سے مارنے کی دھمکیاں دی ہیں، شیخ رشید

اسلام ٹائمز۔ وزارت داخلہ نے کہا ہے کہ شیخ رشید احمد کی جان کو تحریک طالبان پاکستان سے خطرہ لاحق ہے۔ ذرائع کے مطابق نیشنل کرائسز مینجمنٹ سیل کی جانب سے جاری ہونے والے الرٹ کے مطابق شیخ رشید پر حملے کے لئے ٹی ٹی پی نے ٹاسک دے دیا ہے۔ سیل کی جانب سے راولپنڈی اسلام آباد پولیس کو ہدایت جاری کی گئی ہے کہ شیخ رشید کی سکیورٹی سخت کی جائے۔ شیخ رشید کی لال حویلی کی سکیورٹی بڑھانے کی ہدایات بھی جاری کی گئی ہیں۔ ادھر اسپیکر قومی اسمبلی ایاز صادق نے شیخ رشید کو فون کرکے انہیں ملنے والی دھمکیوں پر تشویش کا اظہار کیا ہے اور وفاقی حکومت کی جانب سے انہیں سکیورٹی فراہم کرنے کی یقین دہانی کرائی ہے۔ شیخ رشید نے اسپیکر کو بتایا کہ انہیں فون پر جان سے مارنے کی دھمکیاں دی جا رہی ہیں۔