انتخابی عمل اور پولنگ جیسے معاملات میں افواج پاکستان کو دور رکھا جائے، پاک فوج

اسلام ٹائمز۔ آرمی چیف اور ڈی جی آئی ایس آئی کی پارلیمانی رہنماؤں سے ملاقات میں پارلیمانی رہنماؤں نے نیب کے حوالے سے تحفظات کا اظہار کیا ہے۔ تفصیلات کے مطابق آرمی چیف، ڈی جی آئی ایس آئی اور پارلیمانی رہنماؤں کے مابین گذشتہ ہفتے ملاقات ہوئی، جس میں گلگت بلتستان کے انتظامی امور پر بات چیت کی گئی۔ ملاقات میں گلگت بلتستان کو نیا صوبہ بنانے کی تجویز پر اتفاق کیا گیا۔ شرکاء نے تجویز دی کہ گلگت بلتستان میں انتخابات کا یہ کام نئی اسمبلی پر چھوڑ دیا جائے اور نئی اسمبلی خود قرارداد پاس کرے گی۔ ملاقات میں شریک ہونے والے مسلم لیگ نون کے وفد میں شہباز شریف، خواجہ آصف اور احسن اقبال شامل تھے۔ بلاول بھٹو زرداری اور شیری رحمٰن بھی وفد کے ہمراہ ملاقات میں موجود تھے۔

ذرائع کا کہنا ہے کہ گذشتہ دنوں گلگت بلتستان الیکشن کے حوالے سے اہم میٹنگ ہوئی، جس میں قومی سلامتی کے اداروں نے سیاسی رہنماؤں پر واضح کر دیا کہ فوج کو انتخابی عمل سے الگ رکھا جائے۔ قومی سلامتی سے وابستہ حکام نے اس عزم کو دہرایا کہ پاک فوج ملک میں امن و امان کے قیام کے لیے اپنے فرائض ماضی کی طرح ادا کرتی رہے گی۔ لیکن انتخابی عمل، پولنگ جیسے معاملات سے افواج پاکستان کو دور رکھا جائے اور سول امور اور معاملات کو سول انتظامیہ ہی سرانجام دے۔ ذرائع کے مطابق ملاقات میں پارلیمانی رہنماؤں نے نیب کے حوالے سے خدشات کا اظہار کیا، جس پر عسکری قیادت نے کہا کہ نیب کو آپ نے خود بنایا، اس میں ہمارا کوئی کردار نہیں۔