دہشتگردوں سے تصادم میں 2 سکیورٹی اہلکار شہید، 4 دہشتگرد ہلاک

اسلام ٹائمز۔ شمالی وزیرستان میں سکیورٹی فورسز اور دہشت گردوں کے مابین جھڑپ میں کالعدم تنظیم کے دو کمانڈروں سمیت چار دہشت گرد ہلاک ہوگئے ہیں جبکہ سکیورٹی فورسز کے 2 اہلکار شہید جبکہ 4 اہلکار زخمی ہوگئے ہیں۔ تفصیلات کے مطابق میر علی کے علاقے شیراتلہ بوبلی میں سکیورٹی فورسز اور دہشت گردوں کے درمیان تصادم ہوا۔ جس میں فائرنگ کے تبادلے میں دو اہم دہشت گرد کمانڈروں امداد اللہ اور رسول نواز سمیت چار دہشت گرد ہلاک ہوگئے ہیں جبکہ دہشت گردوں کی فائرنگ سے سکیورٹی فورسز کے دو اہلکار شہید اور 4 زخمی ہوئے ہیں۔ زخمی سکیورٹی اہلکاروں کو علاج کیلئے سی ایم ایچ بنوں منتقل کیا گیا ہے۔ ہلاک ہونے والے دہشت گرد سکیورٹی فورسز پہ حملوں اور دیگر دہشت گردانہ کارروائیوں میں ملوث تھے۔