احتجاج میں بیٹھے طلباء پر پولیس کا لاٹھی چارج، متعدد طلباء گرفتار

اسلام ٹائمز۔ پاکستان میڈیکل کمیشن کی جانب سے انٹری ٹیسٹ میں بے ضابطگیوں کے خلاف کوئٹہ پریس کلب کے سامنے طلباء جماعتیں آج اپنا احتجاج ریکارڈ کروانے جمع ہوئی۔ طلباء نے پریس کلب کے سامنے پلے کارڈز اور تقریروں کے ذریعے اپنے تحفظات کا اظہار کیا، مگر کچھ دیر بعد انہوں نے اپنے احتجاج کا رخ ریڈ زون ایریا کی طرف موڑ دیا اور احتجاج کرتے ہوئے کوئٹہ سیکرٹریٹ کے سامنے آپہنچے۔ طلباء نے سرکاری عمارت کے سامنے اہم شاہراہ ٹریفک کے لئے مکمل طور پر بند کرتے ہوئے پی ایم سی کے خلاف نعرے بازی شروع کر دی۔ احتجاج کی وجہ سے سرکاری عمارت میں بدنظمی اور ٹریفک میں شدت آئی تو پولیس حکام نے طلباء پر لاٹھی چارج کرتے ہوئے متعدد طلباء کو گرفتار کر لیا۔ لاٹھی چارج کے نتیجے میں کچھ طلباء زخمی بھی ہوئے ہیں۔