بی جے پی کے دور اقتدار میں ایک لاکھ کسانوں نے خودکشی کی ہے، پرینکا گاندھی

اسلام ٹائمز۔ کانگریس کمیٹی کی جنرل سکریٹری پرینکا گاندھی نے کسانوں کے معاملے پر بی جے پی کو نشانہ بنایا ہے۔ پرینکا گاندھی نے کہا کہ بی جے پی کی قیادت والی این ڈی اے حکومت میں ایک لاکھ سے زیادہ کسان خودکشی کر چکے ہیں۔ انہوں نے کہا کہ نہ کسانوں کی آمدنی دوگنی ہوئی ہے اور نہ ہی ایم ایس پی دیا گیا ہے۔ انہوں نے وعدہ کیا کہ اگر کانگریس کی حکومت بنتی ہے تو نہ صرف ایم ایس پی کی ضمانت دی جائے گی بلکہ کسانوں کے لئے قرض معافی بھی ہوگی۔ انہوں نے کہا کہ ملک میں پارلیمانی انتخابات کی تیاریاں جاری ہیں اور اس وقت ہر پارٹی اپنے منشور میں کسانوں کے لئے کئی وعدے کر رہی ہے۔ اسی طرح کا وعدہ کانگریس نے کیا ہے، جس میں کہا گیا ہے کہ وہ کسانوں کو ایم ایس پی کی قانونی ضمانت دینے جا رہی ہے۔ یہاں غور کرنے والی بات یہ ہے کہ پنجاب ہریانہ سرحد پر احتجاج کرنے والے کسانوں کا بھی یہی مطالبہ ہے۔ وہ مسلسل حکومت سے مطالبہ کر رہے ہیں کہ انہیں فصلوں پر ایم ایس پی کی قانونی ضمانت دی جائے۔

اسی دوران پرینکا گاندھی نے سوشل میڈیا پلیٹ فارم پر الزام لگایا انہوں نے ٹویٹ کیا کہ آج ملک میں روزانہ 30 کسان خودکشی کر رہے ہیں، بی جے پی کے دور میں 1 لاکھ سے زیادہ کسانوں نے خودکشی کی ہے۔ انہوں نے کہا کہ زراعت میں استعمال ہونے والی ضروری اشیاء اور آلات پر جی ایس ٹی وصول کیا جاتا ہے۔ کانگریس کی جنرل سکریٹری نے الزام لگایا کہ 10 سالوں میں نہ تو کسانوں کو ایم ایس پی ملا اور نہ ہی ان کی آمدنی دوگنی ہوئی۔ انہوں نے کہا کہ قرض میں ڈوبے کسانوں کا ایک پیسہ بھی معاف نہیں کیا گیا، لیکن چند صنعت کاروں کے 16 لاکھ کروڑ روپے معاف کر دیے گئے۔ ملک کے خوراک فراہم کرنے والوں سے وعدہ کرتے ہوئے پرینکا گاندھی نے کہا کہ کانگریس حکومت میں کسانوں کے قرضے معاف کر دیے جائیں گے، زرعی آلات جی ایس ٹی مفت ہوں گے، ایم ایس پی کی قانونی ضمانت ہوگی۔