ڈاکٹر جمال شاہ کے قتل کیخلاف خیبر پختونخوا کے ہسپتالوں میں ہڑتال

اسلام ٹائمز۔ پشاور سمیت خیبر پختونخوا کے کئی اضلاع میں سینئر ڈاکٹر سید جمال شاہ کے قتل کیخلاف بڑے سرکاری ہسپتالوں میں ڈاکٹروں کی ہڑتال جاری ہے، معروف ماہر امراض قلب ڈاکٹر سید جمال شاہ کی نعش ہفتہ کے روز خیبر ایجنسی کے علاقے جمرود سے برآمد ہوئی تھی، جس کیخلاف اسی روز سے ڈاکٹروں نے احتجاج شروع کر دیا تھا، اسی طرح آج بھی صوبائی ڈاکٹرز ایسوسی ایشن کی کال پر صوبے کے مختلف اضلاع کے سرکاری ہسپتالوں میں ڈاکٹروں نے ہڑتال جاری رکھی جبکہ صرف او پی ڈی اور وارڈز میں ڈاکٹرز ڈیوٹی سر انجام دے رہے ہیں، واضح رہے کہ پارا چنار سے تعلق رکھنے والے ڈاکٹر سید جمال شاہ کو دو ماہ قبل پشاور سے اغواء کیا گیا تھا، جس کے بعد دہشتگرد اغواء کاروں نے انہیں بے دردی سے قتل کر دیا۔