اسلام ٹائمز۔ شیعہ علماء کونسل ضلع پشاور کی یونٹ سازی کی تکمیل کے بعد ضلع پشاور اور ڈویژن پشاور کے انتخابات عمل میں لائے گئے۔ جس کے تحت حاجی برکت علی میر ڈویژنل صدر، آغا سید پھول شاہ کاظمی ڈویژنل سیکرٹری جنرل اور آخونزادہ مجاہد علی اکبر کو ضلع پشاور کا صدر منتخب کیا گیا۔ شیعہ علماء کونسل خیبر پختونخوا کے سیکرٹریٹ میں ضلعی جعفریہ کونسل کا انتخابی اجلاس صوبائی صدر علامہ محمد رمضان توقیر کی صدارت میں منعقد ہوا، انتخاب کے بعد علامہ محمد رمضان توقیر نے نو منتخب عہدیداروں سے حلف لیا۔ بعد ازاں نو منتخب صدور حاجی برکت علی میر اور آخونزادہ مجاہد علی اکبر نے اپنے خطابات میں پشاور کے تمام یونٹس کے نمائندوں کی جانب سے اعتماد کا اظہار کرنے پر اُن کا شکریہ ادا کرتے ہوئے یقین دلایا کہ وہ اپنی قومی خدمات میں کوئی دقیقہ فرو گذاشت نہیں کرینگے اور جماعت کو عوامی سطح پر منظم کر کے قومی اور سیاسی دائرے میں جماعت کے کلیدی کردار کو اُجاگر کرنے میں اپنی تمام تر صلاحیتں بروئے کار لائیں گے۔