اسلام ٹائمز۔ پاکستان پیپلزپارٹی کے چیئرمین بلاول بھٹو زرداری نے کہا ہے کہ قومی اسمبلی اور سینیٹ میں اپوزیشن کا بھرپور کردار ادا کریں گے، الیکشن کمیشن انتخابات میں دھاندلیوں کا نوٹس لے۔ بلاول ہاؤس کراچی میں سندھ سے قومی و صوبائی اسمبلی کے انتخابات میں کامیابی حاصل کرنے والے امیدواروں سے ویڈیو لنک کے ذریعے خطاب کرتے ہوئے بلاول بھٹو زرداری نے کہا کہ سندھ کے عوام نے محترمہ بینظیر بھٹو سے محبت کا ثبوت دیا۔ ان کا کہنا تھا کہ پیپلز پارٹی نے نامساعد حالات میں انتخابات میں حصہ لیا۔ اب قومی اسمبلی اور سینیٹ میں اپوزیشن کا بھرپور کردار ادا کریں گے۔ بلاول بھٹو کا کہنا تھا کہ محاذ آرائی کی سیاست نہیں کریں گے۔ مفاہمت کی پالیسی جاری رکھی جائے گی۔ اس سے قبل صدر زرداری سے پیپلزپارٹی کے کامیاب امیدواروں نے ملاقات کی۔ صدر سے ملاقات کے بعد میڈیا سے بات چیت میں پیپلزپارٹی کے رہنما نوید قمر نے بتایا کہ صدر آصف زرداری نے کہا ہے کہ گذشتہ حکومت میں جو خرابیاں سامنے آئی تھیں، انہیں اب کسی صورت برداشت نہیں کیا جائے گا۔