سامراجی طاقتوں کو شکست فاش دینے کیلئے حسینی کردار ادا کرنا ہو گا، راغب نعیمی

اسلام ٹائمز۔ نعیمین ایسوسی ایشن کے سرپرست اعلیٰ، جامعہ نعیمیہ کے ناظم اعلیٰ اور ممتاز عالم دین مولانا راغب حسین نعیمی نے جامعہ نعیمہ گڑھی شاہو لاہور میں علما ومشائخ کے اجلاس سے خطاب کرتے ہوئے کہا کہ پاکستان میں فرقہ وارنہ آگ بھڑکانے کی سازشیں کی جا رہی ہیں، ملک میں قائم امن کے لئے حکومت اور شہریوں کو مشترکہ کردار ادا کرنا ہو گا۔ انہوں نے کہا کہ ہمیں وطن عزیز میں دین کے نام  پر انتہا پسندی کو ہوا دینے والوں کا محاسبہ کرنا ہو گا۔ انہوں نے کہا کہ عوام اپنے اردگرد پھیلے انسان نما شر پسندوں کی سرگرمیوں پر کڑی نظر رکھیں تاکہ کوئی ناخوشگوار واقعہ پیش نہ آئے۔ انہوں نےکہا کہ محرم الحرام مقدس مہینہ ہے جو محبت، اخوت، برداشت اور صبرو تحمل کا درس دیتا ہے۔ سامراجی طاقتوں کو شکست فاش دینے کیلئے حسینی کردار ادا کرنا ہو گا۔ سیدنا امام حسین علیہ السلام نے دین اسلام کے لئے اپنا سب کچھ قربان کر کے وہ مقام حاصل کیا جو رہتی دنیا تک انسانیت کو جبر واستبداد کیخلاف جہاد کا درس دیتا رہے گا۔