اسلام ٹائمز۔ سعودی عرب کے وزیر خارجہ عادل الجبیر نے کہا ہے کہ یمن میں القاعدہ سے جنگ ہماری ترجیح ہے، القاعدہ اور داعش جیسی دہشت گرد تنظیموں کا خاتمہ ضروری ہوگیا ہے۔ فرانسیسی اخبار کو دیئے گئے انٹرویو میں سعودی وزیر خارجہ نے کہا کہ القاعدہ اور داعش دہشت گرد تنظمیں ہیں، تاہم حوثی یمنی شہری اور ہمارے ہمسائے ہیں، جن سے مذاکرات کئے جا سکتے ہیں۔ عادل الجبیر نے حوثیوں اور یمنی حکومت کے درمیان کویت میں جاری مذاکرات کے حوالے سے متعلق امید افزا خیالات کا اظہار کیا۔ سماجی رابطے کی مائیکرو بلاگنگ سائٹ سے اپنے سرکاری اکاونٹ سے جاری پیغام میں عادل الجبیر کا کہنا تھا کہ آپ حوثیوں سے اتفاق کریں یا اختلاف، تاہم اس حقیقت سے انکار نہیں کیا جا سکتا کہ حوثی، یمنی معاشرے کا حصہ ہیں۔