اسلام ٹائمز۔ وزیراعظم آزادکشمیر راجہ فاروق خان نے سدھن قبیلہ کے جد امجد نواب جسی خان مرحوم کی یادگار کا افتتاح کر دیا، اس موقع پر مولانا سعید یوسف، عبدالخالق وصی، سردار اعجاز افضل اور دیگر سیاسی شخصیات کے علاوہ افسر بھی موجود تھے۔ وزیراعظم آزاد کشمیر نے کہا کہ نواب جسی خان کی تحریک آزادی میں خدمات کو ہمیشہ یاد رکھا جائے گا ان کے مزار تک پختہ سڑک اور دیگر تمام سہولتوں کی فراہمی کیلئے عملی اقدامات کیے جائیں گے، اجتماع میں گستاخانہ خاکوں، مقبوضہ کشمیر میں جاری تحریک آزادی اور کشمیریوں کی نسل کشی کے حوالے سے قراردادیں منظور کی گئیں۔ بعدازاں وزیراعظم نے جسہ پیر میں چنار کا پودا لگا کر شجر کاری مہم کا آغاز کیا۔