دیامر میں بدامنی چھوٹا مسئلہ ہے، جسکا دروازہ ہمیشہ کیلئے بند کر دیا جائیگا، لیفٹیننٹ جنرل بلال اکبر

اسلام ٹائمز۔ کمانڈر ٹین کور لیفٹیننٹ جنرل بلال اکبر نے کہا ہے کہ شرپسند عناصر سرنڈر کریں، ورنہ قانون کی گرفت میں لایا جائے گا، ہم یہاں پر ہیں اور دیامر کا امن عزیز ہے، انہوں نے چلاس میں مقامی گرینڈ جرگہ اور عمائدین دیامر سے خطاب کرتے ہوئے کہا کہ عوام اور جرگہ کے سکیورٹی اداروں کے ساتھ تعاون کو قدر کی نگاہ سے دیکھتے ہیں، دیامر کے عوام محب وطن ہیں۔ انہوں نے واضح کیا کہ تمام مسائل کا حل گفت و شنید اور باہمی رضامندی کے ذریعے نکالا جاسکتا ہے، قانون سے بالاتر کوئی نہیں، دیامر میں بدامنی ایک چھوٹا مسئلہ ہے، جس کا دروازہ ہمیشہ کیلئے بند کر دیا جائے گا، انہوں نے کہا کہ ڈیم متاثرین کے نوے فیصد مسائل حل ہونے جا رہے ہیں، ڈیم کے بعد علاقے میں خوشحالی آئے گی، روزگار کے وسیع مواقع میسر آئیں گے۔