تہران اپنے میزائل پروگرام پر کسی بھی قسم کے مذاکرات کو قبول نہیں کریگا، بہرام قاسمی

اسلام ٹائمز۔ فرانس کی طرف سے ایران کے میزائل سسٹم کے بارے میں سوال اٹھانے پر ایران نے سخت ردعمل کا اظہار کیا ہے۔ سعودی چینل الحدث کے مطابق فرانس کی طرف سے ایران کے بیلسٹک میزائل پروگرام کو بہانہ بنا کر اقتصادی پابندیاں سخت کرنے کے اعلان پر ایران نے انتہائی سخت ردعمل کا اظہار کیا ہے۔ واضح رہے کہ اسلامی جمہوریہ ایران کی وزارت خارجہ کے ترجمان بہرام قاسمی نے تاکید کے ساتھ  کہا ہے کہ تہران اپنے میزائل پروگرام پر کسی بھی قسم کے مذاکرات کو قبول نہیں کرے گا۔ وزارت خارجہ کے ترجمان بہرام قاسمی نے مزید کہا کہ ایران اپنے میزائلوں کی قابلیت اور طاقت کو حالات کے مطابق مزید بڑھانے کی بھی پوری توانائی رکھتا ہے اور یہ سلسلہ جاری رہے گا۔

وزارت خارجہ کے ترجمان کا کہنا تھا کہ ایران خطے میں امن و استحکام کی مضبوطی چاہتا ہے، تاہم امریکہ اور بعض یورپی ممالک بشمول فرانس کی جانب سے خطے میں بڑے پیمانے پر مہلک ہتھیاروں کی فروخت سے علاقائی امن و استحکام کو نقصان پہنچ رہا ہے۔ انہوں نے کہا کہ فرانسیسی حکام کو بارہا اس بات سے آگاہ کیا جاچکا ہے کہ اسلامی جمہوریہ ایران اپنے میزائل پروگرام پر کسی سے مذاکرات نہیں کرے گا۔ الحدث نے مزید کہا ہے کہ فرانس امریکی موقف کی حمایت کر رہا ہے اور اس نے سپاہ پاسداران کے اعلیٰ افسروں کی فرانس آمد پر پابندی کی بھی دھمکی دی ہے۔