اسلام ٹائمز۔ ہرنائی کی تحصیل شاہرگ میں ایف سی کی گاڑی کے قریب بارودی سرنگ کے دھماکے کے نتیجے میں ایک اہلکار شہید اور 5 زخمی ہو گئے ہیں۔ لیویز ذرائع کے مطابق بلوچستان کے ضلع ہرنائی کی تحصیل شاہرگ میں ایف سی کی گاڑی گشت پر تھی کہ اس دوران سڑک کنارے پہلے سے نصب شدہ بم اچانک دھماکے سے پھٹ گیا جس کے نتیجے میں ایک اہلکار شہید جبکہ 5 زخمی ہو گئے ہیں۔ دھماکے کے فوری بعد ریسکیو ٹیمیں موقع پر پہنچیں اور امدادی کارروائیاں کرتے ہوئے زخمیوں کو قریبی اسپتال منتقل کیا جہاں انہیں طبی امداد فراہم کی جا رہی ہے۔ دوسری جانب پولیس اور سکیورٹی اداروں نے علاقے میں سرچ آپریشن شروع کر دیا ہے۔