علامہ راجہ ناصر عباس کی سید ارشاد حسین سے ملاقات

اسلام ٹائمز۔ سربراہ مجلس وحدت مسلمین پاکستان علامہ راجہ ناصر عباس کی قیادت میں ایم ڈبلیو ایم کے اعلیٰ سطحی وفد نے آئی جی خیبر پختونخوا (ر) سید ارشاد حسین سے ان کے گھر پر ملاقات کی۔ وفد میں وائس چیئرمین ایم ڈبلیو ایم علامہ سید احمد اقبال رضوی ، مرکزی سیکرٹری سیاسیات سید اسد عباس نقوی اور سید محسن شہریار زیدی شامل تھے۔ ملاقات میں ملکی سیاسی حالات پر گفتگو ہوئی۔ اس موقع پر کرم میں پائیدار امن کو بحال کرنے اور مسلکی تعصبات ختم کرنے، علاقے کی ترقی کیلئے لائحہ عمل ببنانے  پر بھی بات چیت ہوئی۔ اس موقع پر ائیر مارشل (ر) سید قیصر حسین بھی موجود تھے۔ملکی سطح پر حالیہ الیکشن میں ایم ڈبلیو ایم اور پی ٹی آئی کے اتحاد کو سراہا گیا۔ سربراہ ایم ڈبلیو ایم نے حالیہ الیکشن میں کرم میں سپورٹ کرنے پر آئی جی (ر) سید ارشاد حسین، ائیر مارشل سید قیصر حسین اور ان کی پوری ٹیم کا شکریہ ادا کیا۔